കുറവിലങ്ങാട് കാർഷിക വിജ്ഞാന-വിനോദ-വിപണന പ്രദർശനവും ചർച്ചകളും മത്സരങ്ങളുമായി കോഴാ ഫാം ഫെസ്റ്റ് -'ഹരിതാരവം 2കെ25' സമാപിച്ചു. സമാപന സമ്മേളനം ജില്ലാ പഞ്ചായത്ത് പ്രസിഡണ്ട് ഹെമലത പ്രേം സാഗർ ഉദ്ഘാടനം ചെയ്തു.

Yes Vartha Editor September 30, 2025

പഞ്ചായത്ത് വൈസ് പ്രസിഡണ്ട് ജോസ് പുത്തൻകാല അധ്യക്ഷൻ ആയിരുന്നു. മോൻസ് ജോസഫ് എംഎൽഎ മുഖ്യപ്രഭാഷണം നടത്തി. ജില്ലാ പഞ്ചായത്ത് അംഗം നിർമ്മല ജിമ്മി, കൃഷിവകുപ്പ് അഡീഷണൽ ഡയറക്ടർ തോമസ് സാമുവൽ, ബ്ലോക്ക് പഞ്ചായത്ത് അംഗങ്ങളായ ഡോക്ടർ സിന്ധു മോൾ ജേക്കബ്, പിസി കുര്യൻ പി എം മാത്യു തുടങ്ങിയവർ പ്രസംഗിച്ചു.

പ്രദർശന വിപണ സ്റ്റാളുകൾ ബുധനാഴ്ച കൂടി പ്രവർത്തിക്കും. കൃഷി വകുപ്പും കോട്ടയം ജില്ലാ പഞ്ചായത്തും സംയുക്തമായാണ് പരിപാടി സംഘടിപ്പിച്ചത്.

കോഴായിലെ ജില്ലാ കൃഷിത്തോട്ടം, സംസ്ഥാന വിത്ത് ഉത്പാദന കേന്ദ്രം, പ്രാദേശിക കാർഷിക പരിശീലന കേന്ദ്രം, ഉഴവൂർ ബ്ലോക്ക് പഞ്ചായത്ത് ഓപ്പൺ ഓഡിറ്റോറിയം എന്നിവിടങ്ങളിലായാണ് പരിപാടി നടന്നത്.

കാർഷികാനുബന്ധ പ്രദർശന സ്റ്റാളുകൾ, നെല്ല്, തെങ്ങ്, പച്ചക്കറി കൃഷികളിലെ നൂതന വിഷയങ്ങളിലുള്ള സെമിനാറുകൾ, ഭക്ഷ്യമേള, കലാസന്ധ്യ, നെൽകൃഷിയിലെ അനുഭവ പരിചയം, കുട്ടികർഷക സംഗമം, രുചിക്കൂട്ട് സംഗമം, ഫാം തൊഴിലാളി ജീവനക്കാരുടെ സംഗമം, പെറ്റ് ഷോ എന്നിവ ഫെസ്റ്റിന്റെ ഭാഗമായി നടന്നു. നാലുദിവസവും കാർഷിക യന്ത്രങ്ങളുടെ സർവീസ് ക്യാമ്പും സൗജന്യ മണ്ണ് പരിശോധനാ സൗകര്യവും ലഭ്യമാകും.

കൃഷിവകുപ്പിന്റെ അഗ്രോ ക്ലിനിക് ഓൺലൈൻ സേവനങ്ങൾക്ക് പ്രത്യേക കൗണ്ടറും സജ്ജമാക്കിയിരുന്നു..

സാംസ്‌കാരിക ഘോഷയാത്ര, കലാസന്ധ്യ, സൗഹൃദ സദസുകൾ, ഫൺ ഗെയിംസ്, ലക്കി ഡ്രോ, സെൽഫി പോയിന്റുകൾ, കർഷകർക്കും വിദ്യാർഥികൾക്കുമുള്ള ക്വിസ്, നാടൻ പാട്ട്, ഉപന്യാസ രചന, പെൻസിൽ ഡ്രോയിങ്, മഡ് ഗെയിംസ്, തുടങ്ങിയവയും മേളയുടെ ഭാഗമായി നടന്നു.