മീനച്ചിൽ താലൂക്ക് എൻഎസ്എസ് യൂണിയന്റെ നവതി ആഘോഷങ്ങൾക്ക് തുടക്കം...... ശതാഭിഷേകം കഴിഞ്ഞ പ്രവർത്തകരെ യൂണിയൻ നേതാക്കൾ വീടുകളിലെത്തി ആദരിക്കും

Yes Vartha Editor September 05, 2026

മീനച്ചിൽ താലൂക്ക് എൻഎസ്എസ് യൂണിയന്റെ നവതി ആഘോഷങ്ങൾക്ക് തുടക്കം കുറിച്ചുകൊണ്ട്, താലൂക്കിലെ വിവിധ കരയോഗങ്ങളിലെ ശതാഭിഷേകം (84 വയസ്) കഴിഞ്ഞ മുതിർന്ന പ്രവർത്തകരെ അവരുടെ ഭവനങ്ങളിലെത്തി ആദരിക്കുന്ന 'സൗഹൃദം 2026' പദ്ധതിക്ക് തുടക്കമാകുന്നു. യൂണിയന്റെ ചരിത്രത്തിൽ വേറിട്ട മാതൃകയാകുന്ന ഈ ആദരവ് പദ്ധതി, ദീർഘകാലമായി സംഘടനയ്ക്കായി പ്രവർത്തിച്ച മുതിർന്ന തലമുറയോടുള്ള ആദരസൂചകമായാണ് നടപ്പാക്കുന്നത്.

പദ്ധതിയുടെ താലൂക്കുതല ഉദ്ഘാടനം സെപ്റ്റംബർ 8 ചൊവ്വാഴ്ച രാവിലെ 9 മണിക്ക് 1174-ാം നമ്പർ കളത്തൂർ എൻഎസ്എസ് കരയോഗത്തിൽ നടക്കും. തുടർന്ന് താലൂക്കിലെ വിവിധ കരയോഗങ്ങളുടെ നേതൃത്വത്തിൽ അർഹരായ മുതിർന്ന പ്രവർത്തകരുടെ വീടുകളിലെത്തി ഉപഹാരങ്ങളും സ്നേഹാദരവും അർപ്പിക്കുന്ന പരിപാടികൾ സംഘടിപ്പിക്കും.

സംഘടനയുടെ വളർച്ചയ്ക്കും കരയോഗങ്ങളുടെ പ്രവർത്തനങ്ങൾ ശക്തിപ്പെടുത്തുന്നതിനും വർഷങ്ങളോളം സേവനം അനുഷ്ഠിച്ച മുതിർന്ന പ്രവർത്തകരുടെ അനുഭവസമ്പത്തും സമർപ്പണബോധവും പുതുതലമുറയ്ക്ക് മാതൃകയാകണമെന്ന ലക്ഷ്യത്തോടെയാണ് പദ്ധതി ആവിഷ്‌കരിച്ചതെന്ന് യൂണിയൻ ഭാരവാഹികൾ അറിയിച്ചു.

നവതി ആഘോഷങ്ങളുടെ ഭാഗമായി വർഷം മുഴുവൻ വിവിധ സാമൂഹിക, സാംസ്കാരിക, ക്ഷേമപരിപാടികൾ സംഘടിപ്പിക്കാനും യൂണിയൻ തീരുമാനിച്ചിട്ടുണ്ട്. യൂണിയൻ ഭരണസമിതിയുടെ നേതൃത്വത്തിൽ കരയോഗങ്ങൾ, വനിതാ സമാജങ്ങൾ, പ്രതിനിധിസഭാ അംഗങ്ങൾ, സ്വയംസഹായ സംഘങ്ങൾ എന്നിവയുടെ ഏകോപനത്തോടെയാണ് പരിപാടികൾ നടപ്പാക്കുന്നത്.

വിദ്യാഭ്യാസം, ആരോഗ്യം, കുടുംബക്ഷേമം, സാമൂഹിക സേവനം എന്നിവയ്ക്ക് മുൻഗണന നൽകുന്ന വിവിധ പദ്ധതികൾ ഇതിനകം യൂണിയന്റെ നേതൃത്വത്തിൽ നടപ്പിലാക്കി വരികയാണെന്നും, നവതി ആഘോഷങ്ങളുടെ ഭാഗമായി കൂടുതൽ ജനോപകാരപ്രദമായ പദ്ധതികൾക്കും രൂപം നൽകുമെന്നും ഭാരവാഹികൾ വ്യക്തമാക്കി.

സംഘടനയുടെ പാരമ്പര്യവും മൂല്യങ്ങളും പുതിയ തലമുറയിലേക്ക് കൈമാറുന്നതിനൊപ്പം, മുതിർന്ന പ്രവർത്തകരുടെ സേവനങ്ങളെ സമൂഹം അംഗീകരിക്കുന്ന ആദരവേദിയായി 'സൗഹൃദം 2026' മാറുമെന്ന പ്രതീക്ഷയിലാണ് മീനച്ചിൽ താലൂക്ക് എൻഎസ്എസ് യൂണിയൻ നേതാക്കൾ.