കേരള പിഡബ്‌ളുഡി റിട്ട. ചീഫ് എന്‍ജിനീയറും ആലപ്പുഴ വെളിയനാട് മാളിയേക്കല്‍ എട്ടുകെട്ടില്‍ കുടുംബാംഗവുമായ എറണാകുളം രവിപുരം വാന്റേജ് പോയിന്റിലെ എം.എ. ചാക്കോ (89) അന്തരിച്ചു.
സംസ്‌കാരം നാളെ (തിങ്കള്‍) രാവിലെ 10.30ന് ആലപ്പുഴ പഴവങ്ങാടി മാര്‍ സ്ലീവാ ഫൊറോന പള്ളിയില്‍.
ഭാര്യ: ആലപ്പുഴ മഠത്തിലാക്കല്‍ പരേതനായ ഡോ. എം.കെ. ആന്റണിയുടെ മകള്‍ സൂസമ്മ.
മക്കള്‍: പരേതനായ ആന്റണി ചാക്കോ (കെഎസ്ആര്‍ടിസി മുന്‍ എംഡി, ആലപ്പുഴ), പരേതനായ ജിജോ ചാക്കോ, സജി ചാക്കോ (എന്‍ജിനീയര്‍, എറണാകുളം), സിന്ധു ജോര്‍ജ് (ടീച്ചര്‍, റയണ്‍ ഇന്റര്‍നാഷണല്‍ സ്‌കൂള്‍, ന്യൂഡല്‍ഹി), മാത്യു ചാക്കോ (എറണാകുളം). മരുമക്കള്‍: റാണി (വാര്യംപറമ്പില്‍, ആലപ്പുഴ), പ്രിയ (കരുവേലിത്തറ, ടീച്ചര്‍ ചോയ്‌സ് സ്‌കൂള്‍, എറണാകുളം), ജോര്‍ജ് കള്ളിവയലില്‍ (ദീപിക എഡിറ്റര്‍- നാഷണല്‍ അഫയേഴ്‌സ്, ബ്യൂറോ ചീഫ് ന്യൂഡല്‍ഹി), ഷൈനി (എറണാകുളം).
പൊതുമരാമത്തു വകുപ്പില്‍ അസിസ്റ്റന്റ് എന്‍ജിനീയര്‍ മുതല്‍ ചീഫ് എന്‍ജിനീയര്‍ വരെയുള്ള ഔദ്യോഗിക കാലയാളവില്‍ കേരളത്തിലെ ദേശീയപാതകള്‍ അടക്കം റോഡുകളുടെ വികസനത്തിലും കുട്ടനാട്ടിലെ റോഡ് ശൃംഖല രൂപപ്പെടുത്തുന്നതിലും കാര്‍ഷിക വികസന പ്രവര്‍ത്തനങ്ങളിലും ചാക്കോ നിര്‍ണായ പങ്കു വഹിച്ചിരുന്നു. നിരവധി സര്‍ക്കാര്‍, സ്വകാര്യ സ്ഥാപനങ്ങളുടെ കണ്‍സള്‍ട്ടന്റും പൊതുമേഖലാ ബാങ്കുകളുടെ അംഗീകൃത വാല്യൂവറുമായിരുന്നു. പുന്നപ്രയിലെ കാര്‍മല്‍ പോളിടെക്‌നിക് ആരംഭിച്ച കാലത്ത് സിവില്‍ എന്‍ജീനീയറിംഗില്‍ ലക്ചററായി ഡെപ്യൂട്ടേഷനില്‍ ജോലി ചെയ്തു. ബീവര്‍ ഐലന്റ് ഡെവലപ്‌മെന്റ് ഫോറം എക്‌സലന്‍സ് അവാര്‍ഡ് അടക്കം നിരവധി പുരസ്‌കാരങ്ങള്‍ നേടിയിട്ടുണ്ട്.
മാളിയേക്കല്‍ എട്ടുകെട്ടില്‍ കുടുംബയോഗം രക്ഷാധികാരിയും മുന്‍ പ്രസിഡന്റുമായിരുന്നു. എറണാകുളത്തെ ആലപ്പുഴ കൂട്ടായ്മയുടെ രക്ഷാധികാരി, ആലപ്പുഴ ലയണ്‍സ് ക്ലബ്ബ് പ്രസിഡന്റ്, ആലപ്പുഴ കയര്‍ ക്ലസ്റ്റര്‍ വികസന സൊസൈറ്റി ഡയറക്ടര്‍, ആലപ്പുഴ മുനിസിപ്പാലിറ്റി ജനകീയ വികസന ഫോറം വര്‍ക്‌സ് കമ്മിറ്റി ചെയര്‍മാന്‍, ടീംസ് ഓഫ് ഔര്‍ ലേഡി സംഘടനയുടെ അധ്യക്ഷന്‍, കുട്ടനാട് വികസന ഫോറം അംഗം തുടങ്ങിയ നിലകളില്‍ പ്രവര്‍ത്തിച്ചിട്ടുണ്ട്. വെളിയനാട്, പുളിങ്കുന്ന്, രാമങ്കരി തുടങ്ങിയ മേഖലകളില്‍ നല്ല രീതിയില്‍ കൃഷി ചെയ്യുന്നതിലും ആലപ്പുഴക്കാരുടെ പ്രിയപ്പെട്ട 'ചാക്കോ സര്‍' ശ്രദ്ധിച്ചിരുന്നു. ഫ്രാന്‍സ്, ഇറ്റലി, ഇംഗ്ലണ്ട്, മൗറീഷ്യസ് ഉള്‍പ്പെടെ നിരവധി രാജ്യങ്ങള്‍ സന്ദര്‍ശിച്ചിട്ടുണ്ട്.
കുട്ടനാടിന്റെ സമഗ്ര വികസനത്തില്‍
എം.എ. ചാക്കോയുടെ സംഭാവനയേറെ
പ്രത്യേക ലേഖകന്‍
ആലപ്പുഴയിലും എറണാകുളത്തും വിവിധ സാമൂഹ്യ, സാമുദായിക, കാര്‍ഷിക വികസന പ്രവര്‍ത്തനങ്ങളില്‍ സജീവമായിരുന്നു ഇന്നലെ അന്തരിച്ച എം.എ. ചാക്കോ എട്ടുകെട്ടില്‍. പൊതുമരാമത്തു വകുപ്പില്‍ അസിസ്റ്റന്റ് എന്‍ജിനീയര്‍ മുതല്‍ ചീഫ് എന്‍ജിനീയര്‍ പദവികളില്‍ വരെ ജോലി ചെയ്ത കാലത്ത് കുട്ടനാട്ടിലെ പൊതുമരാമത്ത് റോഡ് ശൃംഖല രൂപപ്പെടുത്തുന്നതിലും കാര്‍ഷിക മേഖലയുടെ അഭിവൃദ്ധിക്കും കേരളത്തിലെ ദേശീയപാതകളുടെ മേല്‍നോട്ടത്തിലും നിര്‍ണായക പങ്കു വഹിച്ചയാളാണ്.
കേന്ദ്രസര്‍ക്കാര്‍ ഫണ്ട് ഉപയോഗിച്ചു 1962ല്‍ നടപ്പിലാക്കിയ കുട്ടനാട് ആര്‍-ബ്ലോക്ക് കായലിന്റെ സ്ഥിരം ബണ്ട് നിര്‍മാണത്തിനുള്ള 'ഹോളണ്ട് സ്‌കീ'മില്‍ അസിസ്റ്റന്റ് എന്‍ജിനീയര്‍ ആയിരുന്നതു മുതല്‍ സജീവ പങ്കാളിയായിരുന്നു. 'കുട്ടനാട് കോള്‍ ഏരിയ ഇന്‍വെസ്റ്റിഗേഷന്‍ ഡിവിഷന്‍' എന്ന പേരില്‍ സംസ്ഥാന ജലസേചന വകുപ്പ് ആലപ്പുഴയില്‍ രൂപീകരിച്ച പ്രത്യേക അന്വേഷണ വിഭാഗത്തിലും പ്രവര്‍ത്തിച്ചു. കുട്ടനാടിന്റെയും വൃഷ്ടിപ്രദേശത്തിന്റെയും സാങ്കേതികവും ജലശാസ്ത്രപരവുമായ വിശദാംശങ്ങള്‍ സംഭരിക്കുന്നതില്‍ അദ്ദേഹം പൂര്‍ണ പങ്കാളിയായി. കുട്ടനാട്ടിലെ തെക്ക്, മധ്യ, വടക്കന്‍ പ്രദേശങ്ങളിലെ കായല്‍, പാടശേഖരങ്ങള്‍ എന്നിവയെ ചുറ്റിപ്പറ്റിയുള്ള പദ്ധതി റിപ്പോര്‍ട്ട് തയറാക്കുന്നതില്‍ പ്രമുഖനായിരുന്നു.
പമ്പ, മണിമല, അച്ചന്‍കോവില്‍, മീനച്ചില്‍ എന്നീ പ്രധാന നദികളിലൂടെ കുട്ടനാട്ടിലേക്കു വലിയ തോതില്‍ വെള്ളം ഒഴുകിയെത്തുന്നതു മൂലം കര്‍ഷകരും നാട്ടുകാരും അനുഭവിക്കുന്ന പ്രയാസങ്ങള്‍ പരിഹരിക്കാന്‍ സര്‍ക്കാരുമായി സഹകരിച്ചു നിരവധി പദ്ധതികള്‍ക്കു ചാക്കോ രൂപം നല്‍കി. വെള്ളപ്പൊക്കവും പുറം ബണ്ടുകള്‍ പൊട്ടി ഉപ്പുവെള്ളം കയറുന്നതും മൂലമുള്ള നെല്‍കൃഷി നഷ്ടം തടയുന്നതിനുള്ള ശ്രമങ്ങളില്‍ മുന്‍പന്തിയിലുണ്ടായിരുന്നു. തണ്ണീര്‍മുക്കം ബണ്ട്, തോട്ടപ്പള്ളി സ്പില്‍വേ എന്നിവയും വേണ്ടവിധം പരിപാലിച്ചിട്ടില്ലാത്ത പാടശേഖരം പുറം ബണ്ടുകളും കുട്ടനാട്ടിലെ വെള്ളപ്പൊക്ക നിയന്ത്രണത്തില്‍ പൂര്‍ണമായി ഫലപ്രദമല്ലെന്ന് ചാക്കോ ചൂണ്ടിക്കാട്ടിയിരുന്നു. വെള്ളപ്പൊക്കവും ഉപ്പുവെള്ളം കയറുന്നതും തടയുന്നതിനായി ബണ്ട്, സ്പില്‍വേ, പുറം ബണ്ട് എന്നിവയുടെ മെച്ചപ്പെടുത്തലിനുള്ള ബദല്‍ പദ്ധതി കേരള സര്‍ക്കാരിനു ചാക്കോ സമര്‍പ്പിച്ചിരുന്നു. നബാര്‍ഡില്‍ നിന്നു ലഭിച്ച സാമ്പത്തിക സഹായം ഉപയോഗിച്ചു പാടശേഖരങ്ങള്‍ക്കു ചുറ്റുമുള്ള സ്ഥിരം പദ്ധതിയുടെ നിര്‍മാണം ഭാഗികമായി പൂര്‍ത്തിയാക്കുന്നതിലും അദ്ദേഹം സഹകരിച്ചു.
കുട്ടനാട് പ്രദേശത്തെ റോഡ് സംവിധാനത്തിന്റെ ആസൂത്രണത്തില്‍ ചാക്കോ സജീവമായി ഉള്‍പ്പെട്ടിരുന്നു. ഇതിനായി പൊതുമരാമത്തു വകുപ്പില്‍ പ്രത്യേക ഉപവിഭാഗം രൂപീകരിക്കാനും താത്പര്യമെടുത്തു. വാളയാര്‍ മുതല്‍ പാറശാല വരെയുള്ള 47-ാം നമ്പര്‍ ദേശീയപാത ഒറ്റവരിയില്‍ നിന്നു വീതി കൂട്ടുന്നതിനും മെച്ചപ്പെടുത്തുന്നതിനുമുള്ള പദ്ധതിയുടെ ആസൂത്രണം, നിര്‍വഹണം എന്നിവയിലും ആലപ്പുഴ, എറണാകുളം നാഷണല്‍ ഹൈവേ ഡിവിഷനുകളുടെ ഏക്‌സിക്യൂട്ടീവ് എന്‍ജിനീയറെന്ന നിലയില്‍ അദ്ദേഹം നേതൃത്വം നല്‍കി. ദേശീയപാതയില്‍ മൊബൈല്‍ മെക്കാനിക്കല്‍ വര്‍ക്ക്‌ഷോപ് തുടങ്ങിയതില്‍ ചാക്കോ നിര്‍ണായക പങ്കുവഹിച്ചു.
സംസ്ഥാനത്തെ റോഡുകളുടെയും പാലങ്ങളുടെയും സര്‍ക്കാര്‍ കെട്ടിടങ്ങളുടെയും ചുമതലയുള്ള സൂപ്രണ്ടിംഗ് എന്‍ജിനീയറായിരിക്കെ നിരവധി പുതിയ വികസന പദ്ധതികളില്‍ സജീവ പങ്കാളിയായി. സുപ്രണ്ടിംഗ്, ചീഫ് എന്‍ജിനീയര്‍ തുടങ്ങിയ പദവികളില്‍ ജില്ലാ ഗ്രാമവികസന പദ്ധതി (ഡിആര്‍ഡിഎ), തദ്ദേശീയ പ്രവൃത്തികള്‍ എന്നിവയുടെ ചുമതല വഹിച്ചിരുന്ന കാലത്ത് വിവിധ ജലസേചന കനാലുകളുടെ ജോലികള്‍ പൂര്‍ത്തീകരിച്ചു.
കേരളത്തിലെ കാര്‍ഷിക മേഖലയുടെയും ഭക്ഷ്യവിളകള്‍ അടക്കമുള്ള കാര്‍ഷികോത്പന്നങ്ങളുടെയും പൊതുവായ വികസനത്തിന് ചാക്കോയുടെ ദീര്‍ഘവീക്ഷണത്തോടെയുള്ള സമീപനം സഹായകമായി. കുട്ടനാട് പ്രദേശത്ത് നെല്‍കൃഷി സ്ഥിരപ്പെടുത്തുന്നതിനും ദ്വിവിള കൃഷി പ്രോത്സാഹിപ്പിക്കുന്നതിനും അദ്ദേഹത്തിന്റെ നിര്‍ദേശങ്ങള്‍ ഏറെ സഹായകമായി. വെളിയനാട്, പുളിങ്കുന്ന്, രാമങ്കരി തുടങ്ങിയ മേഖലകളില്‍ ഏറെക്കാലം കൃഷി ചെയ്ത അനുഭവം കര്‍ഷകരെ സഹായിക്കുന്നതില്‍ ചാക്കോയ്ക്കു പ്രചോദനമായി. സംസ്ഥാനത്തെ വിവിധ പ്രദേശങ്ങളിലെ കാര്‍ഷിക വികസനത്തിനും അടിസ്ഥാന സൗകര്യ വികസനത്തിനുമുള്ള പരിപാടികള്‍ ആസൂത്രണം നടത്തുന്നതിലും ഗണ്യമായ പങ്കുവഹിച്ചു.
"യെസ് വാർത്ത''യിൽ
വാർത്തകൾ കൊടുക്കുന്നതിനും,
പരസ്യങ്ങൾ ചെയ്യുന്നതിനുമായും ,
വാർത്താ സംബന്ധമായ കാര്യങ്ങൾക്കും
വിളിക്കുക.
70 12 23 03 34
 അന്തരിച്ചു. ....കുട്ടനാടിന്റെ സമഗ്ര വികസനത്തില്‍ എം.എ. ചാക്കോയുടെ സംഭാവനയേറെ){kind=link}
0 Comments