ലിസിക്കുട്ടിയുടെ കോൺഗ്രസ് മടക്കം: രാഷ്ട്രീയ നീക്കമോ തിരഞ്ഞെടുപ്പ് കമ്മീഷൻ്റെ നടപടി ഭയമോ?..... ചെയർ പേഴ്സൺ സ്ഥാനം കൊടുക്കാമെന്ന് ഇപ്പോൾ പറഞ്ഞാൽ പോയതിലും സ്പീഡിൽ ലിസിക്കുട്ടി തിരിച്ചു വരുമെന്നും വ്യക്തം ..... യാതൊരു രാഷ്ട്രീയ ധാർമ്മികതയുമില്ലാതെ പാലായിൽ ഒരു പറ്റം കൗൺസിലർമാർ

ലിസിക്കുട്ടിയുടെ കോൺഗ്രസ് മടക്കം: രാഷ്ട്രീയ നീക്കമോ തിരഞ്ഞെടുപ്പ് കമ്മീഷൻ്റെ നടപടി ഭയമോ?.....

ചെയർ പേഴ്സൺ സ്ഥാനം കൊടുക്കാമെന്ന് ഇപ്പോൾ പറഞ്ഞാൽ പോയതിലും സ്പീഡിൽ ലിസിക്കുട്ടി തിരിച്ചു വരുമെന്നും വ്യക്തം ..... യാതൊരു രാഷ്ട്രീയ ധാർമ്മികതയുമില്ലാതെ പാലായിൽ ഒരു പറ്റം കൗൺസിലർമാർ

സുനിൽ പാലാ

പാലാ നഗരസഭയിലെ കോൺഗ്രസ് വിമത നീക്കങ്ങൾക്ക് പുതിയ വഴിത്തിരിവ്. കോൺഗ്രസ് വിമത കൗൺസിലറായിരുന്ന ലിസിക്കുട്ടി പാർട്ടിയിലേക്ക് മടങ്ങുമെന്ന് പ്രഖ്യാപിച്ചതിനു പിന്നിൽ കോൺഗ്രസിനോടുള്ള രാഷ്ട്രീയ അടുപ്പത്തേക്കാൾ തിരഞ്ഞെടുപ്പ് കമ്മീഷന്റെ നടപടിയുണ്ടാകുമെന്ന ആശങ്കയാണെന്ന വാദം ഉയരുന്നു .

വിമതപക്ഷത്തോടൊപ്പം നിന്നിരുന്ന ലിസിക്കുട്ടി ഇപ്പോൾ കോൺഗ്രസിലേക്ക് തിരിച്ചുപോകാൻ തീരുമാനിച്ചത് പാർട്ടിയോടുള്ള പ്രത്യേക സ്നേഹം കൊണ്ടല്ലെന്നും, തിരഞ്ഞെടുപ്പ് കമ്മീഷന്റെ ഭാഗത്തുനിന്നുണ്ടാകാനിടയുള്ള നടപടിയെക്കുറിച്ചുള്ള ആശങ്കയാണ് പ്രധാന കാരണമെന്നുമാണ് വിമത ക്യാമ്പിലെ ഒരു വിഭാഗത്തിന്റെ വിലയിരുത്തൽ.

അതേസമയം, ചെയർപേഴ്സൺ സ്ഥാനവുമായി ബന്ധപ്പെട്ട് ഉണ്ടായ പ്രതീക്ഷകളും ലിസിക്കുട്ടിയുടെ നിലപാട് മാറ്റത്തിന് പിന്നിലുണ്ടെന്ന് വ്യക്തം . ആദ്യഘട്ടത്തിൽ തന്നെ ചെയർപേഴ്സൺ സ്ഥാനം നൽകാമെന്ന ഉറപ്പ് ലഭിച്ചിരുന്നെങ്കിൽ ലിസിക്കുട്ടി വിമത ക്യാമ്പ് വിട്ടുപോകുമായിരുന്നില്ലെന്നും, അത്തരമൊരു വാഗ്ദാനം ഇപ്പോൾ ലഭിച്ചാൽ പോയതിലും വേഗത്തിൽ വിമത വിഭാഗത്തിലേക്ക് തിരിച്ചെത്തും എന്ന അഭിപ്രായവും വിമത കൗൺസിലർമാർക്കുണ്ട്.

അടുത്ത ടേമിൽ ചെയർപേഴ്സൺ സ്ഥാനം നൽകാമെന്ന ധാരണ വിമത വിഭാഗം മുന്നോട്ടുവച്ചിട്ടുണ്ടെങ്കിലും, അപ്പോഴേക്കും തിരഞ്ഞെടുപ്പ് കമ്മീഷന്റെ നടപടി ഉണ്ടാകുമെന്ന ആശങ്ക ലിസിക്കുട്ടിക്കുണ്ട്. അതുകൊണ്ടുതന്നെ ഇപ്പോഴത്തെ മടക്കം രാഷ്ട്രീയമായ സ്ഥിരതയേക്കാൾ സാഹചര്യങ്ങളോടുള്ള പ്രതികരണമാണെന്ന വിമർശനവും ഉയരുന്നുണ്ട്.

ഡി.സി.സി. നേതൃത്വത്തിന് കടുത്ത നിലപാട്

ലിസിക്കുട്ടി താൻ കോൺഗ്രസ് പാർട്ടിയിലേക്ക് മടങ്ങുകയാണെന്ന് വ്യക്തമാക്കിയിട്ടുണ്ടെങ്കിലും, ഉടൻ തിരിച്ചെടുക്കേണ്ടതില്ലെന്ന നിലപാടിലാണ് ഡി.സി.സി. നേതൃത്വം എന്നാണ് സൂചന. നേരത്തെ പാർട്ടിയിൽ നിന്ന് പുറത്താക്കിയ നടപടി പിൻവലിക്കേണ്ടതില്ലെന്നും നേതൃത്വം കരുതുന്നതായാണ് വിവരം.

പാർട്ടി ചിഹ്നത്തിൽ മത്സരിച്ച് വിജയിച്ച ശേഷം പാർട്ടി തീരുമാനങ്ങളോട് സഹകരിക്കാതെ വിമത നിലപാട് സ്വീകരിച്ച കൗൺസിലർമാരുടെ നടപടി കോൺഗ്രസിന് പാലാ നഗരസഭയിൽ വലിയ തിരിച്ചടിയാണ് ഉണ്ടാക്കിയതെന്ന വിലയിരുത്തലും പാർട്ടിക്കുള്ളിലുണ്ട്.

തങ്ങൾക്ക് ആവശ്യമായ സമയത്ത് പാർട്ടിയുടെ പിന്തുണ തേടുകയും, എന്നാൽ പാർട്ടി പ്രതിസന്ധി നേരിടുമ്പോൾ പാർട്ടി കൗൺസിലർമാർ പാർട്ടിക്കൊപ്പം നിൽക്കാതിരിക്കുകയും ചെയ്യുന്ന സ്ഥിതിയാണ് ഇപ്പോൾ പാലായിൽ ഉണ്ടായിരിക്കുന്നതെന്നാണ് കോൺഗ്രസ് നേതൃത്വത്തിൻ്റെ വിമർശനം.

'ഒറ്റക്കെട്ട്' വിമതർ നാലു വഴിക്ക്?

ഒരുകാലത്ത് തങ്ങൾ ഒറ്റക്കെട്ടാണെന്ന് ആവർത്തിച്ച് പ്രഖ്യാപിച്ചിരുന്ന വിമത കൗൺസിലർമാർക്കിടയിൽ ഇപ്പോൾ അഭിപ്രായവ്യത്യാസങ്ങൾ രൂക്ഷമാണ് . പരസ്പരം വിശ്വാസമില്ലാത്ത അവസ്ഥയിലേക്കാണ് വിമത കൂട്ടായ്മ നീങ്ങുന്നതെന്നും ഓരോരുത്തരും സ്വന്തം രാഷ്ട്രീയ നിലനിൽപ്പിനാണ് മുൻഗണന നൽകുന്നതെന്നും ആരോപണമുണ്ട്.

ചെയർപേഴ്സൺ, വൈസ് ചെയർപേഴ്സൺ സ്ഥാനങ്ങളുമായി ബന്ധപ്പെട്ടുള്ള രാഷ്ട്രീയ നീക്കങ്ങളും വ്യക്തിഗത താൽപര്യങ്ങളും വിമത കൂട്ടായ്മയ്ക്കുള്ളിലെ ഐക്യം തകർത്തതായാണ് വിലയിരുത്തൽ.

കോൺഗ്രസ് മണ്ഡലം നേതൃത്വവും പ്രതിസന്ധിയിൽ

വിമത കൗൺസിലർമാരുടെ നീക്കങ്ങൾക്ക് പിന്തുണ നൽകിയെന്ന വിമർശനം നേരിടുന്ന കോൺഗ്രസ് പാലാ മണ്ഡലം നേതൃത്വവും ഇപ്പോൾ പ്രതിസന്ധിയിലായിരിക്കുകയാണ്. വിമത നീക്കങ്ങളെ തുടക്കത്തിൽ രാഷ്ട്രീയമായി കൈകാര്യം ചെയ്ത രീതിയെക്കുറിച്ച് പാർട്ടിക്കുള്ളിൽ തന്നെ ചോദ്യങ്ങൾ ഉയരുന്നുണ്ട്.

പാലാ നഗരസഭയിലെ നിലവിലെ രാഷ്ട്രീയ സാഹചര്യം കോൺഗ്രസിന് ഒരു വലിയ പാഠമായി മാറിയിരിക്കുകയാണ്. പാർട്ടി ചിഹ്നത്തിൽ മത്സരിച്ച് വിജയിച്ച ജനപ്രതിനിധികൾ പിന്നീട് പാർട്ടിക്കെതിരെ നിലപാട് സ്വീകരിച്ചാൽ ഉണ്ടാകുന്ന രാഷ്ട്രീയ പ്രത്യാഘാതം നഗരസഭയിലെ സംഭവവികാസങ്ങൾ വ്യക്തമാക്കുന്നു.

ലിസിക്കുട്ടിയുടെ കോൺഗ്രസ് മടക്കം യഥാർത്ഥ രാഷ്ട്രീയ തിരിച്ചുവരവാണോ, അതോ മാറിയ രാഷ്ട്രീയ സാഹചര്യത്തിൽ സ്വീകരിച്ച താൽക്കാലിക നീക്കമാണോ എന്നതാണ് ഇനി നിർണായകം. അതേസമയം, പാർട്ടി നേതൃത്വത്തിന്റെ തുടർനിലപാടും തിരഞ്ഞെടുപ്പ് കമ്മീഷന്റെ ഭാഗത്തുനിന്നുണ്ടാകാനിടയുള്ള നടപടികളും പാലാ നഗരസഭയിലെ രാഷ്ട്രീയ സമവാക്യങ്ങളെ കൂടുതൽ സങ്കീർണമാക്കുമെന്നാണ് വിലയിരുത്തൽ.