ഇടുക്കി ജില്ലയിലെ മലയോര പാതകളില്‍ റോഡപകടങ്ങള്‍ പെരുകുന്നു. ഇന്നലെയുണ്ടായ വാഹനാപകടത്തിലും ഒരു ജീവന്‍ പൊലിഞ്ഞു. ഞായറാഴ്ച കുമളിയിലും പീരുമേട്ടിലും വാഹനാപകടങ്ങളുണ്ടായി. ജില്ലയില്‍ ഈ വര്‍ഷം ജനുവരി ഒന്നു മുതല്‍ ജൂണ്‍ 30 വരെ ജില്ലയില്‍ ചെറുതും വലുതുമായ 552 റോഡപകടങ്ങളാണ് റിപ്പോര്‍ട്ട് ചെയ്തത്. ഇത്രയും നാളത്തെ അപകടങ്ങളില്‍ പൊലിഞ്ഞത് 61 ജീവനുകള്‍. ഇന്നലെ കുട്ടിക്കാനം-കട്ടപ്പന മലയോര ഹൈവേയില്‍ കരുന്തരുവി ആറാം മൈലിനു സമീപമുണ്ടായ അപകടത്തില്‍ കോഴിമല കോടാലിപ്പാറ കാട്ടുമറ്റത്തില്‍ സന്തോഷാണ് മരിച്ചത്. കാറിലുണ്ടായിരുന്ന മറ്റുള്ളവര്‍ക്കു സാരമായി പരിക്കേറ്റു.
കെഎസ്ആര്‍ടിസി ബസിനു പിന്നില്‍ കാര്‍ ഇടിച്ചു കയറിയാണ് അപകടം. ബസിലിടിച്ചു നിയന്ത്രണം വിട്ട കാര്‍ തിട്ടയിലിടിച്ചാണ് നിന്നത്. അടുത്ത നാളിലാണ് ഈ മലയോര ഹൈവേയുടെ നിര്‍മാണം പൂര്‍ത്തിയാക്കിയത്. മാസം 10 മരണംഒരു മാസം ശരാശരി കുറഞ്ഞത് 10 പേര്‍ ജില്ലയില്‍ വാഹനാപകടങ്ങളില്‍ മരിക്കുന്നുവെന്നാണു കണക്കുകള്‍. ആറു മാസത്തിനിടെ വാഹനാപകടങ്ങളില്‍ 793 പേര്‍ക്കു പരിക്കേറ്റു. ഇതിനുപുറമെ കേസ് രജിസ്റ്റര്‍ ചെയ്യാത്ത അപകടങ്ങളും ഏറെയുണ്ട്. അപകടത്തില്‍പെടുന്നതില്‍ ഏറെയും ഇരുചക്ര വാഹനങ്ങളാണ്. മോട്ടോര്‍ വാഹന വകുപ്പും പോലീസും പരിശോധനകളും ബോധവത്കരണവും ശക്തമാക്കുന്‌പോഴും ജില്ലയില്‍ അപകട മരണ നിരക്ക് ഉയര്‍ന്നു നില്‍ക്കുകയാണ്. അശ്രദ്ധ, അമിതവേഗം പല മലയോര പാതകളും ആധുനിക നിലവാരത്തിലേക്ക് ഉയര്‍ന്നതോടെയാണ് അപകടങ്ങളും വര്‍ധിച്ചത്.
അമിതവേഗം, അശ്രദ്ധ എന്നിവയാണ് അപകടങ്ങള്‍ക്കു പ്രധാന കാരണം. ഇത്തരത്തില്‍ അപകടങ്ങള്‍ ക്ഷണിച്ചു വരുത്തുന്നതിലേറെയും യുവാക്കളാണ്. വളവുകളും തിരിവുകളും നിറഞ്ഞതാണു ജില്ലയിലെ റോഡുകളില്‍ ഭൂരിഭാഗവും. ഇത്തരം റോഡുകളിലൂടെ അമിത വേഗത്തില്‍ വാഹനമോടിക്കുന്നത് അപകടങ്ങള്‍ക്കു വഴിവയ്ക്കും. ഡ്രൈവര്‍മാര്‍ വേണ്ടത്ര വിശ്രമമില്ലാതെ വാഹനമോടിക്കുന്നത്, മദ്യപിച്ചുള്ള ഡ്രൈവിംഗ്, രാത്രി ഹെഡ് ലൈറ്റ് ഡിം ചെയ്യാത്തത്, ഡ്രൈവിംഗിനിടയിലെ മൊബൈല്‍ ഫോണ്‍ ഉപയോഗം എന്നിവയെല്ലാം അപകടങ്ങള്‍ക്കു കാരണമാകുന്നു. വാഹനപ്പെരുപ്പവും റോഡുകളുടെ അടിസ്ഥാന സൗകര്യങ്ങളുടെ അപര്യാപ്തതയും അപകടങ്ങള്‍ക്കു കാരണമാകുന്നുണ്ട്.
"യെസ് വാർത്ത''യിൽ
വാർത്തകൾ കൊടുക്കുന്നതിനും,
പരസ്യങ്ങൾ ചെയ്യുന്നതിനുമായും ,
വാർത്താ സംബന്ധമായ കാര്യങ്ങൾക്കും
വിളിക്കുക.
70 12 23 03 34
0 Comments