സ്തുത്യര്‍ഹമായ സേവനം കാഴ്ചവച്ച നഴ്‌സുമാര്‍ക്കുള്ള സർക്കാർ തല അവാര്‍ഡ് പ്രഖ്യാപിച്ചു...... ജനറൽ നഴ്സിംഗ് വിഭാഗത്തിൽ പാലാ ജനറൽ ആശുപത്രിയിലെ നഴ്സിംഗ് ഓഫീസർ ഗ്രേഡ് വൺ സിന്ധു പി. നാരായണന് ജില്ലാതല പുരസ്ക്കാരം ..... ഇടുക്കിയിൽ മേഴ്സി ചാക്കോ , എറണാകുളത്ത് ശ്യാമള എന്നിവർക്ക് നഴ്സിംഗ് പുരസ്ക്കാരം
സുനിൽ പാലാ
സംസ്ഥാനത്തെ സര്‍ക്കാര്‍ ആശുപത്രികളില്‍ സ്തുത്യര്‍ഹമായ സേവനം കാഴ്ചവച്ച നഴ്‌സുമാര്‍ക്കുള്ള സംസ്ഥാനതല അവാര്‍ഡ് (സിസ്റ്റര്‍ ലിനി പുതുശ്ശേരി അവാര്‍ഡ്) ആരോഗ്യ വകുപ്പ് മന്ത്രി വീണാ ജോര്‍ജ് പ്രഖ്യാപിച്ചു. ആരോഗ്യ, മെഡിക്കല്‍ വിദ്യാഭ്യാസ വകുപ്പുകളില്‍ നിന്നുള്ള നഴ്‌സുമാരെയാണ് അവാര്‍ഡിനായി പരിഗണിച്ചത്. ആരോഗ്യ വകുപ്പ് അഡീഷണല്‍ ചീഫ് സെക്രട്ടറി ചെയര്‍മാനായ സംസ്ഥാനതല സെലക്ഷന്‍ കമ്മിറ്റിയാണ് സൂക്ഷ്മ പരിശോധന നടത്തി അവാര്‍ഡിന് അര്‍ഹരായവരെ തെരഞ്ഞെടുത്തത്.
ആരോഗ്യ വകുപ്പില്‍ ജനറല്‍ നഴ്സിംഗ് വിഭാഗത്തില്‍ സംസ്ഥാനതല പുരസ്‌കാരം ഇടുക്കി ജില്ലാ ആശുപത്രി നഴ്സിംഗ് ഓഫീസര്‍ അരുണ്‍കുമാര്‍ പിഎം, ആരോഗ്യ വകുപ്പിലെ പബ്ലിക് ഹെല്‍ത്ത് നഴ്സിംഗ് വിഭാഗത്തില്‍ സംസ്ഥാനതല പുരസ്‌കാരം ഇടുക്കി വാളറ ദേവിയാര്‍ കുടുംബാരോഗ്യ കേന്ദ്രത്തിലെ ജൂനിയര്‍ പബ്ലിക് ഹെല്‍ത്ത് നഴ്‌സ് ജി. ജോണ്‍ എന്നിവര്‍ക്കാണ്.
മെഡിക്കല്‍ വിദ്യാഭ്യാസ വകുപ്പിലെ ജനറല്‍ നഴ്സിംഗ് വിഭാഗം സംസ്ഥാന തലത്തില്‍ തിരുവനന്തപുരം മെഡിക്കല്‍ കോളേജ് എസ്.എ.ടി. ആശുപത്രി സീനിയര്‍ നഴ്സിംഗ് ഓഫീസര്‍ ജ്യോതി കെ, ജില്ലാതലത്തില്‍ തിരുവനന്തപുരം മെഡിക്കല്‍ കോളേജ് സീനിയര്‍ നഴ്സിംഗ് ഓഫീസര്‍ ഷാനിഫ ബീവി എച്ച്. എന്നിവര്‍ പുരസ്‌കാരത്തിന് അര്‍ഹരായി.
ജനറല്‍ നഴ്സിംഗ് ജില്ലാ തലത്തില്‍ ചിറയിന്‍കീഴ് താലൂക്ക് ഹെഡ് ക്വാര്‍ട്ടേഴ്‌സ് ആശുപത്രിയിലെ സബിത എസ്., കടയ്ക്കല്‍ താലൂക്ക് ആശുപത്രിയിലെ മീനു എ.എസ്., കോട്ടയം പാലാ ജനറല്‍ ആശുപത്രിയിലെ സിന്ധു പി നാരായണന്, എറണാകുളം ജനറല്‍ ആശുപത്രിയിലെ ശ്യാമള എഎന്‍, തൃശൂര്‍ ജനറല്‍ ആശുപത്രിയിലെ ജിഷ എസ്., കോഴിക്കോട് ചേവായൂര്‍ സര്‍ക്കാര്‍ ത്വക്ക് രോഗാശുപത്രിയിലെ ഷൈലജ ടി.കെ. ഇടുക്കി കുമളി കുടുംബാരോഗ്യ കേന്ദ്രത്തിലെ മേഴ്സി ചാക്കോ, കാസര്‍ഗോഡ് തൃക്കരിപ്പൂര്‍ താലൂക്ക് ആശുപത്രിയിലെ ബിനി പി എന്നിവര്‍ പുരസ്‌കാരത്തിന് അര്‍ഹരായി.
പബ്ലിക് ഹെല്‍ത്ത് ജില്ലാതല വിഭാഗത്തില്‍ തിരുവനന്തപുരം പള്ളിച്ചല്‍ കുടുംബാരോഗ്യ കേന്ദ്രത്തിലെ ഫ്‌ളോറന്‍സ്, കൊല്ലം ശൂരനാട് സാമൂഹികാരോഗ്യ കേന്ദ്രത്തിലെ സുബീന കാസിം, ഫോര്‍ട്ട് കൊച്ചി താലൂക്ക് ആസ്ഥാന ആശുപത്രിയിലെ ബിന്ദു കുമാരി ടി., കാസര്‍ഗോഡ് ചെറുവത്തൂര്‍ കുടുംബാരോഗ്യ കേന്ദ്രത്തിലെ സ്മിത രാമന്‍ എന്നിവര്‍ പുരസ്‌കാരത്തിന് അര്‍ഹരായി.
"യെസ് വാർത്ത''യിൽ
വാർത്തകൾ കൊടുക്കുന്നതിനും,
പരസ്യങ്ങൾ ചെയ്യുന്നതിനുമായും ,
വാർത്താ സംബന്ധമായ കാര്യങ്ങൾക്കും
വിളിക്കുക.
70 12 23 03 34
0 Comments