ദുബായില്‍ നിന്ന് ഇസ്രായേലിലെ ടെല്‍ അവീവിലേക്ക് 174 യാത്രക്കാരുമായി പറന്ന ഫ്‌ലൈ ദുബായ് വിമാനത്തില്‍ വെച്ച് സഹപൈലറ്റിന്റെ വധശ്രമത്തെയും വിമാനം തകര്‍ക്കാനുള്ള നീക്കത്തെയും അതിസാഹസികമായി ചെറുത്തുതോല്‍പ്പിച്ച ഭാരതീയ ക്യാപ്റ്റന്‍ സ്മിത് മച്ചാര്‍ ഞെട്ടിക്കുന്ന നിമിഷങ്ങള്‍ വെളിപ്പെടുത്തി.
ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹുവുമായുള്ള കൂടിക്കാഴ്ചയിലാണ് മുംബൈ ഘാട്‌കോപ്പര്‍ സ്വദേശിയായ സ്മിത് മച്ചാര്‍ കോക്പിറ്റില്‍ നടന്ന ഭീകരാക്രമണത്തിന്റെ വിവരങ്ങള്‍ പങ്കുവെച്ചത്. വിമാനം സാധാരണ നിലയില്‍ പറക്കുമ്പോള്‍ പ്രാര്‍ത്ഥിക്കണമെന്നാവശ്യപ്പെട്ട കോ-പൈലറ്റ് ഹമാം അല്‍ ഹമ്മാമി, നിമിഷങ്ങള്‍ക്കകം തന്റെ തലയ്ക്ക് പിന്നില്‍ ക്രൂരമായി വെട്ടിപ്പരിക്കേല്‍പ്പിക്കുകയായിരുന്നുവെന്ന് സ്മിത് ഓര്‍ത്തെടുത്തു.
ആദ്യ ആക്രമണത്തില്‍ തന്നെ കാഴ്ച മങ്ങിപ്പോയെങ്കിലും, വിമാനം അതിവേഗം താഴേക്ക് പതിക്കാന്‍ തുടങ്ങിയതോടെ വിമാനത്തിലുള്ളവരുടെ ജീവന്‍ രക്ഷിക്കാന്‍ കോക്പിറ്റ് വാതില്‍ തുറന്ന് യാത്രക്കാരുടെ സഹായം തേടുകയായിരുന്നു. ഇസ്രായേലി യാത്രക്കാരനും ക്യാബിന്‍ ക്രൂവും ചേര്‍ന്ന് അക്രമിയെ കീഴ്‌പ്പെടുത്തിയാണ് ദുരന്തം ഒഴിവാക്കിയത്.
വീരമൃത്യുവിന്റെ വക്താവില്‍ നിന്ന് 174 യാത്രക്കാരെ രക്ഷിച്ച സ്മിത് മച്ചാറിന്റെ അസാമാന്യ ധീരതയെ ഭാരതീയ പ്രധാനമന്ത്രി നരേന്ദ്ര മോദിയും ബെഞ്ചമിന്‍ നെതന്യാഹുവും ഫോണില്‍ വിളിച്ച് നേരിട്ട് അഭിനന്ദിച്ചു. ഒമാന്‍ സ്വദേശിയായ കോ-പൈലറ്റ് ഹമാം അല്‍ ഹമ്മാമിയെ മുന്‍പ് തീവ്രവാദ ആശയങ്ങളുടെ പേരില്‍ ഒമാനില്‍ വിമാനം പറത്തുന്നതില്‍ നിന്ന് വിലക്കിയിരുന്നുവെന്ന് വാള്‍ സ്ട്രീറ്റ് ജേണല്‍ റിപ്പോര്‍ട്ട് ചെയ്തു.
യു.കെയിലെ പ്രമുഖ സര്‍വ്വകലാശാലയില്‍ പഠനം പൂര്‍ത്തിയാക്കിയ ഇയാള്‍, വ്യാജ പശ്ചാത്തലം സൃഷ്ടിച്ചാണ് മാസങ്ങള്‍ക്ക് മുന്‍പ് ഫ്‌ലൈ ദുബായില്‍ ജോലിയില്‍ പ്രവേശിച്ചത്. ഭാരതീയ ഏജന്‍സികളും യു.എ.ഇ പ്രോസിക്യൂഷനും ഈ സംഭവത്തെ ഔദ്യോഗികമായി ഭീകരാക്രമണ ശ്രമമെന്ന് വിശേഷിപ്പിക്കുകയും അന്താരാഷ്ട്ര തലത്തില്‍ സമഗ്രമായ അന്വേഷണം ഊര്‍ജ്ജിതമാക്കുകയും ചെയ്തിട്ടുണ്ട്.
"യെസ് വാർത്ത''യിൽ
വാർത്തകൾ കൊടുക്കുന്നതിനും,
പരസ്യങ്ങൾ ചെയ്യുന്നതിനുമായും ,
വാർത്താ സംബന്ധമായ കാര്യങ്ങൾക്കും
വിളിക്കുക.
70 12 23 03 34
0 Comments