മക്കൾ ലഹരിക്ക് അടിമകളാകുന്നു; സമൂഹം കരിന്തിരി കത്തുന്നു - വേദന പങ്കുവെച്ച് ബിഷപ്പ് മാർ ജോസഫ് കല്ലറങ്ങാട്ട്..... ലഹരി വിരുദ്ധ യുദ്ധത്തിന് തുടക്കം കുറിച്ച് സീറോ മലബാർ സഭ, തുടക്കം പാലാ രൂപതയിൽ

സുനിൽ പാലാ

നമ്മുടെ മക്കൾ ലഹരിക്ക്  അടിമകളാവുകയും അതുവഴി  സമൂഹം കരിന്തിരി കത്തുകയും ചെയ്യുന്ന ഗുരുതരമായ സാഹചര്യമാണ് ഇന്ന് നിലനിൽക്കുന്നതെന്ന് പാലാ രൂപതാധ്യക്ഷൻ മാർ ജോസഫ് കല്ലറങ്ങാട്ട്.

സീറോ മലബാർ സഭാ  സിനഡൽ കമ്മീഷൻ ഫോർ ഫാമിലി, ലെയ്റ്റി ആൻ്റ് ലൈഫും പാലാ രൂപതാ ജാഗ്രതാ സമിതിയും ചേർന്നുള്ള  സഭാതല ലഹരി വിരുദ്ധ പ്രവർത്തനങ്ങൾക്ക് തുടക്കം കുറിച്ച് സംസാരിക്കുകയായിരുന്നൂ മാർ കല്ലറങ്ങാട്ട്. 

പാലാ രൂപതയിലെ എല്ലാ ഇടവകകളിലെയും വികാരിമാരും യോഗപ്രതിനിധികളും മാതാപിതാക്കളും, അദ്ധ്യാപകരും പി.റ്റി.എ അംഗങ്ങളുമുൾപ്പെടെ ആയിരങ്ങൾ പങ്കെടുത്ത സമ്മേളനമാണ്  പാലാ രൂപതാദ്ധ്യക്ഷനും സിനഡൽ കമ്മീഷൻ ഫോർ ഫാമിലി, ലെയ്റ്റി ആൻ്റ് ലൈഫ് ചെയർമാനുമായ മാർ ജോസഫ് കല്ലറങ്ങാട്ട് ഉത്ഘാടനം ചെയ്തത്. 

 

 കൗമാരക്കാരിൽ പെരുകി വരുന്ന മയക്കുമരുന്ന് ഉപയോഗം ആശങ്കാജനകവും അപകടകരവുമാണെന്ന് ബിഷപ്പ്  ചൂണ്ടിക്കാട്ടി. കുട്ടികളുമായി ബന്ധപ്പെടുന്നവർ അവരുടെ നന്മയ്ക്കായി കാംക്ഷിക്കുകയും പ്രവർത്തിക്കുകയും ചെയ്യുന്നില്ലെങ്കിൽ അതും കുറ്റകരമാണെന്ന് അദ്ദേഹം പറഞ്ഞു. സാമൂഹ്യ തിന്മകൾക്കതിരെ പോരാടാനുള്ള കുലീനത്വം സമൂഹം പ്രകടമാക്കണം.

ഈ കാലഘട്ടത്തിലെ അപകടനിലയെ തരണം ചെയ്യാൻ എല്ലാവരും ഒത്തൊരുമിച്ച് പ്രയത്നിക്കണമെന്നും മാർ കല്ലറങ്ങാട്ട് ഓർമ്മപ്പെടുത്തി. 

 അസി.എക്സൈസ് കമ്മീഷണർ ജയരാജ് പി.കെ.സാഹചര്യത്തിൻ്റെ ഗൗരവം ബോദ്ധ്യപ്പെടുത്തിക്കൊണ്ട് ക്ലാസ്സുകൾക്ക് നേതൃത്വം നൽകി. 

അസ്വസ്ഥതകളുള്ള കുടുംബങ്ങളിലെ കുഞ്ഞുങ്ങൾക്ക് സംരക്ഷണവും മാർഗ്ഗ നിർദ്ദേശവും ലഭിക്കാത്തതിനാൽ മയക്കുമരുന്നുകൾക്കും മറ്റു തിന്മകൾക്കും അടിമപ്പെടാനുള്ള സാദ്ധ്യത ഏറെയാണെന്നും അദ്ധ്യാപകർ പ്രത്യേകം കുട്ടികളുടെ സംരക്ഷകരാകണമെന്നും മാതാപിതാക്കൾ സ്വന്തം മക്കളെ സ്വന്തം ശരീരത്തോട് ചേർത്ത് പിടിക്കണമെന്നും അദ്ദേഹം ഓർമ്മപ്പെടുത്തി. 

പാലാ രൂപത മുഖ്യ വികാരി ജനറാൾ മോൺ. ജോസഫ് തടത്തിൽ ലഹരി വിരുദ്ധ പ്രതിജ്ഞ ചൊല്ലിക്കൊടുത്തു. 

സിനഡൽ കമ്മിഷൻ ഫോർ ഫാമിലി, ലെയ്റ്റി ആൻ്റ് ലൈഫ് ജന.സെക്രട്ടറി ഫാ.ജോബി മൂലയിൽ, സിനഡൽ കമ്മിഷൻ ഫോർ എഡ്യൂക്കേഷൻ  ജനറൽ സെക്രട്ടറി  ഫാ.ബെർക്കുമാൻസ് കുന്നുംപുറം, അൽമായ ഫോറം  ഗ്ലോബൽ  ജന.സെക്രട്ടറി ടോണി ചിറ്റിലപ്പിള്ളി, പ്രോ ലൈഫ് ഗ്ലോബൽ ജന. സെക്രട്ടറി സാബു ജോസ്, മാതൃവേദി ഗ്ലോബൽ ജന. സെക്രട്ടറി റോസിലി തട്ടിൽ, ഫാ.ജേക്കബ് വെള്ളമരുതുങ്കൽ, ഫാ.ജോസ് കുറ്റിയാങ്കൽ ഫാ. വിൻസൻ്റ് മൂങ്ങാമക്കൽ എന്നിവർ സംസാരിച്ചു.