വാക്ക് പാലിച്ച് ഭരണങ്ങാനം പഞ്ചായത്ത് പ്രസിഡന്റ്... തോട്ടില്‍ അനധികൃതമായി സ്ഥാപിച്ച കൂറ്റന്‍ പൈപ്പുകള്‍ പൊളിച്ചുനീക്കി.

സുനില്‍ പാലാ

 
ഭരണങ്ങാനം പഞ്ചായത്ത് പ്രസിഡന്റ് വാക്കുപാലിച്ചു. മൂന്ന് ദിവസംപോലും കാത്തിരുന്നില്ല; തോട്ടില്‍ അനധികൃതമായി സ്ഥാപിച്ച കൂറ്റന്‍ പൈപ്പുകള്‍ ഇന്നലെ ഉച്ചകഴിഞ്ഞ് പൊളിച്ചുനീക്കി. 

 

പഞ്ചായത്ത് പ്രസിഡന്റ് ലിസി സണ്ണി, സെക്രട്ടറി സജിത് മാത്യൂസ്, മെമ്പര്‍ എന്‍.എം. ബിജു എന്നിവരുടെ നേതൃത്വത്തിലാണ് തോട്ടിലെ അനധികൃത നിര്‍മ്മാണം പൊളിച്ചുനീക്കിയത്. കൂറ്റന്‍ പൈപ്പുകള്‍ നീക്കാന്‍ ക്രെയിനും ജെ.സി.ബിയും ലോറിയുമൊക്കെയായി വലിയ സന്നാഹത്തിലായിരുന്നു പഞ്ചായത്ത് അധികാരികളുടെ വരവ്.

ഭരണങ്ങാനം പഞ്ചായത്തിലെ മൂന്നാം വാര്‍ഡില്‍ ആലമറ്റം- കാഞ്ഞിരമറ്റം - നായ്ക്കനാല്‍ മങ്കര തോട്ടില്‍ സ്വകാര്യ വ്യക്തി വഴിക്കായി കൂറ്റന്‍ പൈപ്പുകള്‍ സ്ഥാപിച്ചത് മൂന്ന് ദിവസത്തിനുള്ളില്‍ പൊളിപ്പിക്കുമെന്ന് തിങ്കളാഴ്ച ഭരണങ്ങാനം പഞ്ചായത്ത് പ്രസിഡന്റ് ലിസി സണ്ണി ഉറപ്പു പറഞ്ഞിരുന്നു. എന്നാല്‍ മൂന്ന് ദിവസം പോലും കാത്തുനിന്നില്ല, പറഞ്ഞതിന്റെ പിറ്റേന്നുതന്നെ പ്രസിഡന്റും കൂട്ടരും പറഞ്ഞ വാക്ക് പാലിച്ചു. ഇതോടെ തോട്ടില്‍ ഈ ഭാഗത്ത് വെള്ളം കെട്ടിനിന്ന് വഴിയിലേക്ക് വെള്ളം കയറുമെന്ന ആശങ്ക ഒഴിവായി. 

 

ഭരണങ്ങാനത്ത് തോട് കൈയ്യേറി സ്വകാര്യ വ്യക്തി കൂറ്റന്‍ പൈപ്പ് സ്ഥാപിച്ച വിവരം യെസ് വാര്‍ത്തയാണ് പുറത്തുകൊണ്ടുവന്നത്. തുടര്‍ന്ന് ഫോളോഅപ്പ് വാര്‍ത്തകളും പ്രസിദ്ധീകരിച്ചു. ഇതേ തുടര്‍ന്നാണ് പഞ്ചായത്ത് പ്രസിഡന്റും സെക്രട്ടറിയും സ്ഥലം സന്ദര്‍ശിച്ചതും ഉടന്‍ പൊളിച്ചുനീക്കുമെന്ന പ്രതികരണം അറിയിച്ചതും.

ഇന്നലെ ഉച്ചതിരിഞ്ഞാണ് എല്ലാവിധ സന്നാഹങ്ങളുമായെത്തി തോട്ടിലെ കൂറ്റന്‍ പൈപ്പുകള്‍ നീക്കിയത്.

"യെസ് വാർത്ത''യിൽ 

വാർത്തകൾ കൊടുക്കുന്നതിനും, 

പരസ്യങ്ങൾ ചെയ്യുന്നതിനുമായും , 

വാർത്താ സംബന്ധമായ കാര്യങ്ങൾക്കും       

വിളിക്കുക.

 70 12 23 03 34