60 ഗ്രാമപഞ്ചായത്തുകളിൽ സ്ഥാനാർഥികളിൽ കൂടുതൽ പേർ വനിതകൾ ...... പാലാ , ഈരാറ്റുപേട്ട മുനിസിപ്പാലിറ്റികളിൽ മാത്രം പുരുഷ സ്ഥാനാർത്ഥികൾ കൂടുതൽ.....ഏറ്റവും കൂടുതൽ സ്ത്രീകൾ മത്സരിക്കുന്നത് കോട്ടയം നഗരസഭയിൽ; 89 പേർ
സ്വന്തം ലേഖകൻ
തദ്ദേശ തെരഞ്ഞെടുപ്പിൽ ജില്ലയിൽ സ്ഥാനാർഥികളുടെ അന്തിമ ചിത്രം തെളിഞ്ഞപ്പോൾ ഭൂരിപക്ഷം ഗ്രാമപഞ്ചായത്തുകളിലും എണ്ണത്തിൽ മുന്നിൽ വനിതകൾ.
71 ഗ്രാമപഞ്ചായത്തുകളിൽ 60 ഇടത്തും വനിതാ സ്ഥാനാർഥികളാണ് കൂടുതൽ. ഏറ്റവുമധികം കാഞ്ഞിരപ്പളളിയിലാണ്; 87 സ്ഥാനാർഥികളിൽ 48 വനിതകൾ.
ഏഴിടത്തു മാത്രമാണ് പുരുഷ സ്ഥാനാർഥികൾ കൂടുതൽ; മുളക്കുളം, നീണ്ടൂർ, ബ്രഹ്മമംഗലം, കൊഴുവനാൽ, തീക്കോയി, മീനടം, വാഴപ്പള്ളി ഗ്രാമപഞ്ചായത്തുകൾ. ചെമ്പ്, ഉദയനാപുരം, മൂന്നിലവ്, തലനാട് ഗ്രാമപഞ്ചായത്തുകളിൽ സ്ത്രീ, പുരുഷ സ്ഥാനാർഥികൾ എണ്ണത്തിൽ ഒപ്പത്തിനൊപ്പമാണ്. ഗ്രാമപഞ്ചായത്തുകളിലെ ആകെ സ്ഥാനാർഥികളുടെ എണ്ണം 4032 ആണ്. സ്ത്രീകൾ: 2182, പുരുഷന്മാർ; 1850.
ജില്ലയിൽ ഏറ്റവും കൂടുതൽ വനിതകൾ മൽസരരംഗത്തുള്ള തദ്ദേശസ്ഥാപനം കോട്ടയം നഗരസഭയാണ്; 178 പേരിൽ 89 വനിതകൾ. ചങ്ങനാശേരി (135 സ്ഥാനാർഥികളിൽ 79), ഏറ്റുമാനൂർ (124 സ്ഥാനാർഥികളിൽ 65), വൈക്കം (91 സ്ഥാനാർഥികളിൽ 51 ) നഗരസഭകളിലും സ്ത്രീകളാണ് മുന്നിൽ.
പാലാ, ഈരാറ്റുപേട്ട നഗരസഭകളിൽ മാത്രമാണ് പുരുഷസ്ഥാനാർഥികൾ കൂടുതലുള്ളത്. യഥാക്രമം 69ൽ 35, 80ൽ 41 വീതം. നഗരസഭകളിലെ 677 സ്ഥാനാർഥികളിൽ 357 പേരും വനിതകളാണ് .
83 പേർ മൽസരിക്കുന്ന ജില്ലാ പഞ്ചായത്തിൽ 47 പേരും വനിതകളാണ്. പുരുഷന്മാർ 36 പേർ. എന്നാൽ ബ്ളോക്ക് പഞ്ചായത്തുകളിലെ സ്ഥാനാർഥികളുടെ ആകെ എണ്ണത്തിൽ പുരുഷന്മാരാണ് മുന്നിൽ. 489 പേരിൽ 237 പേരാണ് വനിതാ സ്ഥാനാർഥികൾ - പുരുഷന്മാരേക്കാൾ 15 കുറവ്.
11 ബ്ളോക്കുകളിൽ കടുത്തുരുത്തി, ഏറ്റുമാനൂർ, പാമ്പാടി ബ്ളോക്കുകളിലാണ് വനിതകൾ കൂടുതൽ, പള്ളം ബ്ളോക്കിൽ ഒപ്പത്തിനൊപ്പമാണ്. ബാക്കി ഏഴു ബ്ളോക്കുകളിലും പുരുഷന്മാരാണ് എണ്ണത്തിൽ കൂടുതൽ.
ജില്ലയിലെ ആകെ സ്ഥാനാർഥികളുടെ എണ്ണം 5281 ആണ്. ഇതിൽ 2823 പേർ സ്ത്രീകളാണ്. പുരുഷന്മാരുടെ എണ്ണം 2458, സ്ത്രീകളേക്കാൾ 365 പേർ കുറവ്.
"യെസ് വാർത്ത''യിൽ
വാർത്തകൾ കൊടുക്കുന്നതിനും,
പരസ്യങ്ങൾ ചെയ്യുന്നതിനുമായും ,
വാർത്താ സംബന്ധമായ കാര്യങ്ങൾക്കും
വിളിക്കുക.
70 12 23 03 34
0 Comments