മൂന്നാനി ലോയേഴ്സ് ചേംബർ ഉദ്ഘാടനം; "യെസ് വാർത്ത " യിലൂടെ വന്ന കൗൺസിലർ സിജി ടോണിയുടെ കുറിപ്പ് കുറിയ്ക്കു കൊണ്ടു; നഗരസഭാ ചെയർമാൻ അടിയന്തിരമായി ഇടപെട്ടു; വാർഡ് കൗൺസിലർ ലിജി ബിജുവിൻ്റെ പേരിന് ശിലാഫലകത്തിൽ മുകളിലേക്ക് സ്ഥാനമാറ്റം

YES VARTHA EXCLUSIVE

തമ്പുരാൻ

ലോയേഴ്സ് കോംപ്ലക്സ് ഉദ്ഘാടന പരിപാടിയിലും നോട്ടീസിലും ശിലാഫലകം വെയ്ക്കുന്നതിലും   വാർഡ് കൗൺസിലർ ലിജി ബിജുവിന് വേണ്ട പരിഗണന നൽകിയില്ലെന്നായിരുന്നു പ്രതിപക്ഷ കൗൺസിലർ സിജി ടോണിയുടെ ആക്ഷേപം; സിജി മുനിസിപ്പൽ കൗൺസിലർമാരുടെ ഗ്രൂപ്പിൽ മാത്രമായി ഇട്ട  മെസേജ് " യെസ് വാർത്ത " പുറത്തു കൊണ്ടുവന്നതോടെ നഗരസഭാ ചെയർമാൻ ആൻ്റോ ജോസ് അടിയന്തിരമായി വിഷയത്തിൽ ഇടപെടുകയായിരുന്നു. 

ഉദ്ഘാടന ശിലാഫലകത്തിൽ സ്റ്റാൻഡിംഗ് കമ്മിറ്റി ചെയർമാൻമാരുടെ പേരു കഴിഞ്ഞാലുടൻ  വാർഡ് കൗൺസിലർ ലിജി ബിജുവിൻ്റെ പേര് ചേർക്കാൻ ചെയർമാൻ നിർദ്ദേശം നൽകിക്കഴിഞ്ഞു.

 ഇന്നലെയാണ്  സിജി ടോണി കൗൺസിലർമാരുടെ വാട്സപ്പ് ഗ്രൂപ്പിൽ ഇക്കാര്യത്തിൽ തൻ്റെ അഭിപ്രായം രേഖപ്പെടുത്തിക്കൊണ്ടുള്ള കുറിപ്പിട്ടത്. എന്നാൽ ഇന്ന് ഉച്ചയോടെ "യെസ് വാർത്ത " ഇക്കാര്യം പുറത്തു കൊണ്ടുവന്നതോടെ ചെയർമാൻ ആൻ്റോ ജോസ് ഉടൻ വിഷയത്തിൽ ഇടപെടുകയായിരുന്നു. 

ലിജി ബിജുവിനു വേണ്ടി  സിജി ടോണി കുറിച്ച കാര്യം ഒരിക്കൽ കൂടി വായനക്കാരിലേക്ക്;

"നഗരസഭ മൂന്നാനി ഒമ്പതാം വാർഡിൽ നിർമ്മിച്ചിരിക്കുന്ന ലോയേഴ്സ് കോംപ്ലക്സ് സമുച്ചയം നാടിന് തുറന്ന് നൽകുന്നതിൽ ഭരണ നേതൃത്വത്തെ അകമഴിഞ്ഞ് അഭിനന്ദിക്കുന്നു.... 

സാധാരണ  സ്വകാര്യ ചടങ്ങിൽ പോലും സ്ഥലം വാർഡ് കൗൺസിലർക്ക് മാന്യമായ ഒരു പോസ്റ്റ് നൽകാറുണ്ട്.

ഇത് നഗരസഭയുടെ സ്വന്തം സ്ഥലത്ത് നഗരസഭ സ്വന്തമായി കെട്ടിടം നിർമ്മിച്ച് നാടിന് സമർപ്പിക്കുന്ന ചടങ്ങ്.

ഇവിടെ ചെയർമാൻ, വൈസ് ചെയർപേഴ്സൺ കഴിഞ്ഞ് ഒരു ചെറിയ പരിഗണന സ്ഥലം വാർഡ് കൗൺസിലർക്ക് നൽകേണ്ടതല്ലേ... ?

നമ്മൾ നൽകിയില്ലെങ്കിൽ പിന്നെ ആരാണ് നൽകുന്നത് ...?

 നാടിന് മുമ്പിൽ പ്രദർശിപ്പിക്കുന്ന വലിയ പരസ്യ ബോർഡുകളിൽ അവരുടെ ഫോട്ടോ കൂടി ചെറുതായി വച്ചാൽ അത് ഉത്തമമായ ഒരു മാതൃകയായി ജനം വിലയിരുത്തില്ലേ ?

ശരിയാണ്, മൂന്നാനി വാർഡ് കൗൺസിലർ ലിജി ബിജു പ്രതിപക്ഷ കൗൺസിലറാണ്. അംഗീകരിക്കുന്നു.

 മൂന്നാനിയിലേത് ഒരു ഭരണപക്ഷ കൗൺസിലറാണ് എങ്കിൽ ഇപ്രകാരം സംഭവിക്കുമോ ?

 

ഉറപ്പാണ് ശിലാഫലകം

എൻ്റെ എളിയ ഒരു അഭിപ്രായം നഗരസഭയിലെ 26 വാർഡിലെയും കൗൺസിലർമാരുടെയും സെക്രട്ടറിയുടെയും മുനി.എഞ്ചിനിയറുടെയും പേരുകൾ ആലേഖനം ചെയ്ത ശിലാഫലകം അവിടെ സ്ഥാപിക്കുന്നതാണ് ഉചിതം.

ഇല്ലായെങ്കിൽ മറ്റുള്ളവരുടെയൊപ്പം സ്ഥലം  വാർഡ് കൗൺസിലറുടെ പേര് മാത്രമെങ്കിലും ഉൾപ്പെടുത്താനുള്ള സാമാന്യ മര്യാദ കാണിക്കുമെന്ന് പ്രതീക്ഷിക്കുന്നു.

ഉന്നയിച്ച  വിഷയങ്ങൾ പോസിറ്റീവായി മാത്രം എടുക്കുക.....

സിജി ടോണി കുറിപ്പ് അവസാനിപ്പിക്കുന്നു....

സിജി ചൂണ്ടിക്കാട്ടിയതുപോലെ മുഴുവൻ കൗൺസിലർമാരുടെ പേരും ലോയേഴ്സ് കോംപ്ലക്സ് ഉദ്ഘാടന ശിലാഫലകത്തിലുണ്ടാകും. മാത്രമല്ല, വാർഡ് കൗൺസിലർ ലിജി ബിജുവിൻ്റെ പേരിന് മുൻഗണനയും നൽകും. ലിജിയുടെ പേരിനു താഴെയായി മറ്റ്  വാർഡ് കൗൺസിലർമാരുടെ പേരുകൾ വാർഡ് നമ്പർ അടിസ്ഥാനത്തിലുമുണ്ടാകും.