വിവാദങ്ങൾക്കല്ല, ഭരണപരമായ പക്വതയ്ക്കാണ് സർക്കാർ പ്രാധാന്യം നല്കുന്നത്....ജനങ്ങളുടെ ജീവൻ സംരക്ഷിക്കുന്ന പകർച്ചവ്യാധി പ്രതിരോധ പ്രവർത്തനങ്ങൾക്ക് പ്രഥമ പരിഗണന നൽകി ആരോഗ്യവകുപ്പ് മന്ത്രി കെ. മുരളീധരൻ.

Yes Vartha Editor June 24, 2026

ആരോഗ്യവകുപ്പിലെ ഭരണപരമായ വിവാദങ്ങളിലും വ്യക്തിപരമായ പരാതികളിലും പെട്ട് സമയം കളയാതെ, സംസ്ഥാനത്തെ ജനങ്ങളുടെ ജീവൻ സംരക്ഷിക്കുന്ന പകർച്ചവ്യാധി പ്രതിരോധ പ്രവർത്തനങ്ങൾക്ക് പ്രഥമ പരിഗണന നൽകി ആരോഗ്യവകുപ്പ് മന്ത്രി കെ. മുരളീധരൻ. ഡിഎച്ച്എസ് നിയമനവുമായി ബന്ധപ്പെട്ട് ഡോ. കെ.ജെ. റീന നടത്തുന്ന നിയമപോരാട്ടത്തെക്കുറിച്ചുള്ള ചോദ്യങ്ങൾക്ക് കടുത്ത ഭാഷയിലാണ് മന്ത്രി മറുപടി നൽകിയത്. ആരോഗ്യവകുപ്പിൽ 57,000-ത്തിൽപ്പരം ജീവനക്കാരുണ്ടെന്നും അവരിൽ ഓരോരുത്തരുടെയും ചോദ്യങ്ങൾക്കും പരാതികൾക്കും മറുപടി നൽകി നടക്കലല്ല ഒരു ആരോഗ്യമന്ത്രിയുടെ ജോലിയെന്നും അദ്ദേഹം അസന്നിഗ്ദ്ധമായി വ്യക്തമാക്കി.

സംസ്ഥാനത്ത് രോഗങ്ങൾ കൂടുതൽ പടരാതിരിക്കാനുള്ള പ്രതിരോധ പ്രവർത്തനങ്ങൾക്കാണ് ഈ ഘട്ടത്തിൽ സർക്കാർ മുൻഗണന നൽകുന്നത്. ഇതിന്റെ ഭാഗമായി സംസ്ഥാനത്തെ പകർച്ചവ്യാധി പ്രതിരോധവുമായി ബന്ധപ്പെട്ട് ഹൈപ്പവർ കമ്മിറ്റി സമർപ്പിച്ച റിപ്പോർട്ടിൻമേൽ ഒട്ടും സമയം കളയാതെ അടിയന്തര നടപടികൾ സ്വീകരിക്കുമെന്ന് മന്ത്രി അറിയിച്ചു. പ്രതിരോധ പ്രവർത്തനങ്ങൾ കുറ്റമറ്റതാക്കാൻ വിവിധ വകുപ്പുകളിലെ മന്ത്രിമാരുമായി നേരിട്ട് ആലോചിച്ച് ആവശ്യമായ വലിയ ഏകോപനം യുദ്ധകാലാടിസ്ഥാനത്തിൽ ഉണ്ടാക്കുമെന്നും അദ്ദേഹം കൂട്ടിച്ചേർത്തു. പ്രതിരോധ പ്രവർത്തനങ്ങളിലെ മുൻകാല വീഴ്ചയെക്കുറിച്ചുള്ള ചോദ്യങ്ങൾക്ക്, ഫെബ്രുവരി മാസം മുതൽ തന്നെ ഈ പ്രവർത്തനങ്ങൾ ആരംഭിക്കേണ്ടതായിരുന്നു എന്ന് മന്ത്രി തുറന്നുസമ്മതിച്ചു. എന്നാൽ രോഗം പൂർണ്ണമായി പടർന്നുപിടിച്ചതിന് ശേഷമുള്ള കടുത്ത പ്രതിസന്ധി ഘട്ടത്തിലാണ് തനിക്ക് ഈ വകുപ്പിന്റെ ചുമതല ലഭിച്ചതെന്നും, ആ വെല്ലുവിളി ഏറ്റെടുത്ത് ശക്തമായ പ്രവർത്തനങ്ങളുമായി മുന്നോട്ട് പോകുമെന്നും അദ്ദേഹം ചൂണ്ടിക്കാട്ടി.

മറ്റ് രാഷ്ട്രീയ-വിവാദ വിഷയങ്ങളിലെ ചോദ്യങ്ങളോട്, ഉയർന്നുവരുന്ന എല്ലാ അനാവശ്യ കാര്യങ്ങൾക്കും മറുപടി നൽകേണ്ട ബാധ്യത തനിക്കില്ലെന്നായിരുന്നു മന്ത്രിയുടെ ദൃഢമായ പ്രതികരണം. എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശനെതിരെയുള്ള അന്വേഷണത്തെക്കുറിച്ചുള്ള മാധ്യമങ്ങളുടെ ചോദ്യങ്ങൾക്ക്, അതിൽ കൃത്യമായ തീരുമാനമെടുക്കേണ്ടത് ആഭ്യന്തരവകുപ്പാണെന്ന് കെ. മുരളീധരൻ വ്യക്തമാക്കി. മന്ത്രിസഭയ്ക്ക് കൃത്യമായ കൂട്ടുത്തരവാദിത്വമാണുള്ളത്. അതിനാൽ ഇത്തരം നയപരമായ വിഷയങ്ങളിൽ പരസ്പരം ചർച്ച ചെയ്തതിന് ശേഷം മാത്രമേ അന്തിമ തീരുമാനമെടുക്കാൻ സാധിക്കൂ എന്നും വിവാദങ്ങൾക്കല്ല, ഭരണപരമായ പക്വതയ്ക്കാണ് സർക്കാർ പ്രാധാന്യം നൽകുന്നതെന്നും അദ്ദേഹം ഓർമ്മിപ്പിച്ചു.