പാലാ ജനറൽ ആശുപത്രിക്കു മുന്നിലെ കഞ്ഞിക്കടകൾക്ക് പുനരധിവാസം; നഗരസഭയിൽ പ്രമേയം അവതരിപ്പിച്ചു .. വിവരം കളക്ടറെ അറിയിക്കും......കോടതി നടപടിയുള്ള കച്ചവടക്കാരന് പിഴയടച്ചാൽ അനുമതി നൽകണമെന്ന് ടോണി തൈപ്പറമ്പിൽ; യുഡിഎഫ് കൗൺസിലർമാർ യോഗത്തിൽനിന്ന് വിട്ടുനിന്നു
പാലാ ജനറൽ ആശുപത്രിക്കു മുന്നിൽ വർഷങ്ങളായി കഞ്ഞിയും പാലും ഉൾപ്പെടെയുള്ള ഭക്ഷ്യവസ്തുക്കൾ വിറ്റ് ഉപജീവനം നടത്തിയിരുന്ന കച്ചവടക്കാരെ പുനരധിവസിപ്പിക്കണമെന്ന പ്രമേയം പാലാ നഗരസഭാ കൗൺസിൽ യോഗം അംഗീകരിച്ചു. നഗരസഭയുടെ തീരുമാനം ജില്ലാ കളക്ടറെ ഔദ്യോഗികമായി അറിയിക്കാനും യോഗം തീരുമാനിച്ചു.
നഗരസഭാ ഭരണപക്ഷമായ നഗരവികസന മുന്നണിയുടെ കൺവീനർ ബിജു പാലൂപ്പടവിൽ അവതാരകനായും ഭരണപക്ഷ കൗൺസിലർ ലീനാ സണ്ണി അനുവാദകയായും അവതരിപ്പിച്ച പ്രമേയമാണ് കൗൺസിൽ അംഗീകരിച്ചത്.
ആശുപത്രിയിലെത്തുന്ന രോഗികൾക്കും കൂട്ടിരിപ്പുകാർക്കും ഭക്ഷണം ലഭ്യമാക്കുന്നതിൽ വർഷങ്ങളായി ഇത്തരം ചെറുകിട കച്ചവടക്കാർ നിർണായക പങ്കുവഹിക്കുന്നുണ്ട്. ഇവരുടെ ഉപജീവനമാർഗം പൂർണമായും ഇല്ലാതാക്കാതെ മാനുഷിക പരിഗണന നൽകി പുനരധിവസിപ്പിക്കണമെന്ന നിലപാടാണ് പ്രമേയത്തിലൂടെ നഗരസഭ മുന്നോട്ടുവെച്ചത്.
അതേസമയം, നഗരസഭയ്ക്കെതിരെ നിയമനടപടി സ്വീകരിച്ച സാബു എന്ന കച്ചവടക്കാരന്റെ കാര്യത്തിൽ പ്രത്യേക നിലപാട് സ്വീകരിക്കണമെന്ന് കൗൺസിലർ ടോണി തൈപ്പറമ്പിൽ ആവശ്യപ്പെട്ടു. നഗരസഭയ്ക്കെതിരെ കേസ് നൽകിയ സാഹചര്യത്തിൽ ഇയാൾ നഗരസഭയ്ക്ക് പിഴ അടച്ചതിനുശേഷം മാത്രമേ വീണ്ടും കച്ചവടം നടത്താൻ അനുമതി നൽകാവൂ എന്നായിരുന്നു ടോണിയുടെ നിർദേശം.
ജില്ലാ കളക്ടറുടെ നിർദേശങ്ങളും തീരുമാനങ്ങളും നിലനിൽക്കുന്ന സാഹചര്യത്തിൽ അവയെ മറികടക്കുന്ന തരത്തിൽ തീരുമാനമെടുക്കാൻ നഗരസഭയ്ക്ക് അധികാരമില്ലെന്നാണ് യുഡിഎഫ് നിലപാട്. ഇക്കാര്യം യുഡിഎഫിലെ ഒരു കൗൺസിലർ ചൂണ്ടിക്കാട്ടി. എന്നാൽ, നഗരസഭയുടെ ഭാഗത്തുനിന്നുള്ള മാനുഷിക പരിഗണനയും കച്ചവടക്കാരുടെ ഉപജീവനപ്രശ്നവും പരിഗണിച്ചാണ് പ്രമേയം കൊണ്ടുവന്നതെന്നാണ് ഭരണപക്ഷത്തിന്റെ നിലപാട്.
പ്രമേയം ചർച്ചയ്ക്കെടുത്ത കൗൺസിൽ യോഗത്തിൽ പ്രതിപക്ഷമായ യുഡിഎഫിലെ കൗൺസിലർമാരാരും ഹാജരായിരുന്നില്ല. ബോധപൂർവം യോഗം ബഹിഷ്കരിച്ചതാണെന്ന് യുഡിഎഫിലെ ഒരു അംഗം വ്യക്തമാക്കി. കളക്ടറുടെ തീരുമാനത്തെ മറികടക്കാൻ നഗരസഭയ്ക്ക് അധികാരമില്ലെന്ന നിലപാടാണ് യോഗത്തിൽനിന്ന് വിട്ടുനിൽക്കാനുള്ള കാരണമായി അദ്ദേഹം വിശദീകരിച്ചത്.
പ്രമേയം അംഗീകരിച്ചതോടെ ആശുപത്രിക്കു മുന്നിലെ ചെറുകിട കച്ചവടക്കാരുടെ പുനരധിവാസം സംബന്ധിച്ച തുടർനടപടികൾ ഇനി ജില്ലാ കളക്ടറുടെ നിലപാടിനെ ആശ്രയിച്ചായിരിക്കും. നഗരസഭയുടെ തീരുമാനം കളക്ടറെ അറിയിക്കുന്നതോടെ വിഷയത്തിൽ ജില്ലാ ഭരണകൂടത്തിന്റെ പ്രതികരണവും നിർണായകമാകും.
70 12 23 03 34



0 Comments