ഓണത്തോടനുബന്ധിച്ച് ജില്ലയിലേക്കു വിനോദ സഞ്ചാരികളുടെ ഒഴുക്ക് കൂടി. ഇടവിട്ടുള്ള മഴ ആശങ്കപ്പെടുത്തുന്നുണ്ടെങ്കിലും ഇന്നലെ മുതല്‍ വിദ്യാലയങ്ങള്‍ അടച്ചതിനാല്‍ ഇന്നു മുതല്‍ സഞ്ചാരികളുടെ വലിയ പ്രവാഹംതന്നെയാണ് പ്രതീക്ഷിക്കുന്നത്. വാഗമണിലെയും മൂന്നാറിലെയും മഞ്ഞും തണുപ്പും ആസ്വദിക്കാന്‍ ഒട്ടേറെ വിനോദ സഞ്ചാരികള്‍ ഇപ്പോള്‍ എത്തുന്നുണ്ട്. ഹോട്ടലുകളിലും റിസോര്‍ട്ടുകളിലും ബുക്കിംഗ് വര്‍ധിച്ചതായി ടൂറിസം വകുപ്പ് അധികൃതര്‍ അറിയിച്ചു. വെള്ളച്ചാട്ടങ്ങളും സജീവം ഓണം അവധി ആഘോഷമാക്കാന്‍ അന്യസംസ്ഥാനങ്ങളില്‍നിന്നടക്കം സഞ്ചാരികളെത്തും.
ഒട്ടേറെ പേര്‍ മാസങ്ങള്‍ക്കു മുന്പുതന്നെ പ്രധാന ഹോട്ടലുകളിലെയും റിസോര്‍ട്ടുകളിലെയും മുറികള്‍ ബുക്ക് ചെയ്തിട്ടുണ്ട്. സന്ദര്‍ശകര്‍ക്കായി ടൂര്‍ ഓപ്പര്‍മേറ്റര്‍മാര്‍ മുഖേന പാക്കേജുകളും ഒരുക്കിയിട്ടുണ്ട്. മഴ പെയ്തു നില്‍ക്കുന്നതിനാല്‍ വെള്ളച്ചാട്ടങ്ങളും ജലസമൃദ്ധമാണ്. വാഹനം നിര്‍ത്തി വെള്ളച്ചാട്ടത്തിന്റെ സൗന്ദര്യം ആസ്വദിക്കാനും ചിത്രങ്ങളെടുക്കാനും സഞ്ചാരികള്‍ സമയം കണ്ടെത്തുന്നുണ്ട്. ഇതിനു പുറമെ ജില്ലയിലെ ചില മലഞ്ചെരിവുകളില്‍ നീലക്കുറിഞ്ഞി പൂവിട്ടതും ദൃശ്യാനുഭവമാകും.
നല്ലൊരു വിഭാഗം സഞ്ചാരികള്‍ തമിഴ്‌നാട്ടിലെ കന്പത്ത് മുന്തിരിപ്പാടം കാണാനും എത്തും. ഓണം വാരാഘോഷം ടൂറിസം വകുപ്പിന്റെ നേതൃത്വത്തില്‍ ജില്ലയില്‍ ഓണം വാരാഘോഷം സംഘടിപ്പിക്കും. മൂന്നാര്‍, തേക്കടി, രാമക്കല്‍മേട്, തൊടുപുഴ എന്നിവിടങ്ങളിലാണ് വിനോദ സഞ്ചാരികളെ ആകര്‍ഷിക്കാന്‍ പരിപാടി. ഇതിനു 11 ലക്ഷം രൂപയാണ് സര്‍ക്കാര്‍ അനുവദിച്ചിരിക്കുന്നത്. ജില്ലയിലെ ടൂറിസം കേന്ദ്രങ്ങളില്‍ വിനോദസഞ്ചാരികളെ സ്വീകരിക്കാന്‍ ഒരുക്കങ്ങളെല്ലാം പൂര്‍ത്തിയാക്കിയതായി അധികൃതരും ഹോട്ടല്‍, റിസോര്‍ട്ട് ഉടമകളും പറഞ്ഞു.
"യെസ് വാർത്ത''യിൽ
വാർത്തകൾ കൊടുക്കുന്നതിനും,
പരസ്യങ്ങൾ ചെയ്യുന്നതിനുമായും ,
വാർത്താ സംബന്ധമായ കാര്യങ്ങൾക്കും
വിളിക്കുക.
70 12 23 03 34
0 Comments