അശരണർക്ക് തണലായി മരിയസദനത്തിന്റെ പുതിയ കേന്ദ്രം 'തലചായ്ക്കാൻ ഒരിടം - ഇടപ്പാടി' സമർപ്പിക്കുന്നു; ഉദ്ഘാടനം മാർച്ച് 17-ന്

Yes Vartha Editor March 14, 2026

കഴിഞ്ഞ 28 വർഷങ്ങളായി അശരണർക്കും ആലംബഹീനർക്കും കൈത്താങ്ങായി പ്രവർത്തിക്കുന്ന മരിയസദനം ചാരിറ്റബിൾ സൊസൈറ്റി സേവനയാത്രയിൽ മറ്റൊരു നാഴികക്കല്ലുകൂടി പിന്നിടുന്നു. തെരുവിൽ അനാഥരാക്കപ്പെടുന്നവർക്കായി ഭരണങ്ങാനം ഗ്രാമപഞ്ചായത്തിലെ ഇടപ്പാടിയിൽ ഒരുക്കിയ പുതിയ പുനരധിവാസ കേന്ദ്രം 'തലചായ്ക്കാൻ ഒരിടം - ഇടപ്പാടി' നാടിന് സമർപ്പിക്കുന്നു.

മരിയസദനത്തിന്റെ 28-ാം വാർഷിക ദിനമായ 2026 മാർച്ച് 17 (ചൊവ്വാഴ്ച) ഉച്ചകഴിഞ്ഞ് 4 മണിക്ക് പാലാ രൂപതാ മെത്രാൻ മാർ ജോസഫ് കല്ലറങ്ങാട്ട് കേന്ദ്രത്തിന്റെ വെഞ്ചരിപ്പും ഉദ്ഘാടനവും നിർവ്വഹിക്കും. തുടർന്ന് നടക്കുന്ന പൊതുസമ്മേളനത്തിൽ രാഷ്ട്രീയ-സാമൂഹിക-സാംസ്കാരിക രംഗത്തെ പ്രമുഖർ പങ്കെടുക്കും.

പദ്ധതിയുടെ പ്രത്യേകതകൾ:

• ലക്ഷ്യം : സമൂഹത്തിലെ പാർശ്വവൽക്കരിക്കപ്പെട്ടവർക്ക് കൈത്താങ്ങാകുക എന്ന ലക്ഷ്യത്തോടെ ഓരോ പഞ്ചായത്തിലും ചെറിയ പുനരധിവാസ കേന്ദ്രങ്ങൾ ആരംഭിക്കുന്ന പദ്ധതിയുടെ ഭാഗമായാണ് ഇത് നിർമ്മിച്ചിരിക്കുന്നത്.

• രണ്ടാമത്തെ കേന്ദ്രം: 'തലചായ്ക്കാൻ ഒരിടം പദ്ധതി പ്രകാരം സജ്ജമാകുന്ന രണ്ടാമത്തെ ഹോം ആണിത്.

• ഭൂമി: ഇടപ്പാടി സ്വദേശി ശ്രീ. മച്ചിയാനിക്കൽ തോമസ് ഉദാരമായി നൽകിയ 60 സെന്റ് ഭൂമിയിലാണ് ഈ കേന്ദ്രം സ്ഥിതി ചെയ്യുന്നത്.

• നിർമ്മാണം: പേര് വെളിപ്പെടുത്താൻ ആഗ്രഹിക്കാത്ത ഒരു അഭ്യുദയകാംക്ഷിയുടെ പൂർണ്ണമായ സാമ്പത്തിക സഹായത്തോടെയാണ് കെട്ടിട നിർമ്മാണം പൂർത്തിയാക്കിയത്.

സ്‌നേഹത്തിന്റെയും കരുതലിന്റെയും ഈ പുതിയ സംരംഭത്തിന് സാക്ഷ്യം വഹിക്കാനും അനുഗ്രഹിക്കാനും എല്ലാ സുമനസ്സുകളെയും ക്ഷണിക്കുന്നതായി മരിയസദനം ഡയറക്ടർ സന്തോഷ് ജോസഫ് അറിയിച്ചു.