പാലാ ജനറൽ ആശുപത്രി റോഡ് ...... പരാതി ഒന്ന്, പ്രസ്താവനകൾ പലത്; ജി.പി.എസ്. സർവേയിലേക്ക് കണ്ണുംകാതും...... നടപടിക്ക് വഴിതുറന്നത് അനൂപ് ബോസിന്റെ പരാതി കൊണ്ടു മാത്രം

പാലാ ജനറൽ ആശുപത്രി റോഡ് ......

പരാതി ഒന്ന്, പ്രസ്താവനകൾ പലത്; ജി.പി.എസ്. സർവേയിലേക്ക് കണ്ണുംകാതും...... നടപടിക്ക് വഴിതുറന്നത് അനൂപ് ബോസിന്റെ പരാതി കൊണ്ടു മാത്രം 

പാലാ കെ.എം. മാണി സ്മാരക ജനറൽ ആശുപത്രിക്ക് മുന്നിലെ റോഡിനോട് ചേർന്നുള്ള കൈയേറ്റവിവാദത്തിൽ ഔദ്യോഗിക അന്വേഷണം ജി.പി.എസ്. സർവേയിലേക്ക് കടക്കുമ്പോൾ, നടപടിക്ക് തുടക്കമിട്ടത് നിയമവിദ്യാർത്ഥിയായ അനൂപ് ബോസ് നൽകിയ പരാതിയാണെന്നതാണ് ശ്രദ്ധേയമാകുന്നത്.

റോഡ് വികസനം ചർച്ചയായതോടെ വിവിധ സംഘടനകളും രാഷ്ട്രീയനേതാക്കളും പ്രസ്താവനകളുമായി രംഗത്തെത്തിയെങ്കിലും, തദ്ദേശ സ്വയംഭരണ സ്ഥാപനങ്ങളുടെ ഓംബുഡ്സ്മാനെ സമീപിച്ച് നിയമനടപടിക്ക് വഴിതുറന്നത് അനൂപ് ബോസ് മാത്രമാണെന്നാണ് രേഖകൾ വ്യക്തമാക്കുന്നത്.

പൊതുഭൂമി കൈയേറി ബങ്കുകളും ഷെഡുകളും സ്ഥാപിച്ചതായും, ഉന്തുവണ്ടി കച്ചവടത്തിനുള്ള അനുമതി മറയാക്കി സ്ഥിരനിർമാണങ്ങൾ നടത്തിയതായും ആരോപിച്ചാണ് അദ്ദേഹം പരാതി നൽകിയത്. ഭൂമിയുടെ യഥാർത്ഥ ഉടമസ്ഥാവകാശം, അതിർത്തി, കൈവശാവകാശം, ലൈസൻസ് എന്നിവ പരിശോധിക്കണമെന്നും പരാതിയിൽ ആവശ്യപ്പെട്ടിട്ടുണ്ട്.

സെപ്റ്റംബർ 15-ലെ പരാതി വഴിത്തിരിവായി

സെപ്റ്റംബർ 15-ന് മുനിസിപ്പാലിറ്റി സെക്രട്ടറിക്ക് രേഖാമൂലം പരാതി നൽകിയ ശേഷവും ഫലപ്രദമായ പരിശോധനയോ തടയൽ നടപടിയോ ഉണ്ടായില്ലെന്നും, ഇതിനിടയിൽ ചില നിർമ്മിതികൾ കൂടുതൽ വിപുലീകരിച്ചുവെന്നും പരാതിയിൽ ചൂണ്ടിക്കാട്ടിയിരുന്നു.

തുടർന്നാണ് വിഷയം ഓംബുഡ്സ്മാന്റെ പരിഗണനയിലെത്തുകയും, സ്ഥലത്തിന്റെ യഥാർത്ഥ സ്ഥിതി പരിശോധിക്കുന്നതിനുള്ള നടപടികൾ വേഗത്തിലാകുകയും ചെയ്തത്.

 നാളെ ജി.പി.എസ്. സർവേ

സ്ഥലത്തിന്റെ അതിർത്തിയും ഉടമസ്ഥാവകാശവും സംബന്ധിച്ച തെളിവുകൾ ശേഖരിക്കുന്നതിനായി നാളെ  ജി.പി.എസ്. സർവേ നടത്തുമെന്ന് ജനറൽ ആശുപത്രി അധികൃതരും മുനിസിപ്പൽ അധികൃതരും അറിയിച്ചു.

സർവേ റിപ്പോർട്ടിന്റെ അടിസ്ഥാനത്തിൽ ഭൂമി മുനിസിപ്പാലിറ്റിയുടേതാണോ, ആശുപത്രിയുടേതാണോ, പുറമ്പോക്ക് ഭൂമിയാണോ എന്നതടക്കമുള്ള വിഷയങ്ങളിൽ കൂടുതൽ വ്യക്തത ലഭിക്കുമെന്നാണ് വിലയിരുത്തൽ.

രാഷ്ട്രീയവിവാദവും ചർച്ചയും

വിഷയം പൊതുചർച്ചയായതോടെ നിരവധി പ്രസ്താവനകൾ പുറത്തുവന്നിട്ടുണ്ടെങ്കിലും, "വാചകമടിക്കാനും കയ്യടി നേടാനും പ്രസ്താവനകൾ എളുപ്പമാണ്; നിയമപരമായ നടപടിയിലേക്ക് നീങ്ങിയത് ഒരാൾ മാത്രമാണ്" എന്ന വിമർശനവും സാമൂഹ്യമാധ്യമങ്ങളിൽ ഉയരുന്നുണ്ട്. എന്നാൽ, ഭൂമിയുടെ ഉടമസ്ഥാവകാശവും കൈയേറ്റാരോപണങ്ങളും സംബന്ധിച്ച അന്തിമനിഗമനം ഔദ്യോഗിക സർവേയും തുടർനടപടികളും ശേഷമായിരിക്കും ഉണ്ടാവുക.

"യെസ് വാർത്ത''യിൽ 

വാർത്തകൾ കൊടുക്കുന്നതിനും, 

പരസ്യങ്ങൾ ചെയ്യുന്നതിനുമായും , 

വാർത്താ സംബന്ധമായ കാര്യങ്ങൾക്കും       

വിളിക്കുക.

 70 12 23 03 34