കവീക്കുന്ന് റോഡ് അധികാരികളെക്കൊണ്ട് നന്നാക്കിക്കാമോ എന്ന് ഞങ്ങളൊന്നു നോക്കട്ടെ...." പാലാ നഗരസഭാ പ്രതിപക്ഷാംഗങ്ങൾ ഇന്ന് വൈകിട്ട് വിവാദ റോഡ് സന്ദർശിക്കും

സുനിൽ പാലാ

കൊച്ചിടപ്പാടി - കവീക്കുന്ന് റോഡ് തകർച്ചയും വിവാദവും മുറുകി നിൽക്കുന്ന വേളയിൽ പാലാ നഗരസഭാ പ്രതിപക്ഷാംഗങ്ങൾ ഇന്ന് സ്ഥലം സന്ദർശിക്കും. 

പ്രതിപക്ഷ പാർലമെൻ്ററി പാർട്ടി ലീഡർ പ്രൊഫ. സതീഷ് ചൊള്ളാനിയുടെ നേതൃത്വത്തിൽ ഇന്ന് വൈകിട്ട് 3.30-നാണ് പ്രതിപക്ഷ കൗൺസിലർമാർ സ്ഥലം സന്ദർശിക്കുന്നത്.

റോഡ് എത്രയും വേഗം നന്നാക്കണമെന്ന ജനകീയ ആവശ്യവും ഉയർന്നിട്ടുണ്ട്. 

പാലാ നഗരസഭാ 7, 8 വാർഡുകളിലൂടെ കടന്നുപോകുന്ന റോഡിൻ്റെ കൊച്ചിടപ്പാടി ഭാഗമാണ് ഏറെ ശോച്യാവസ്ഥയിലുള്ളത്. 

റോഡ് നിർമ്മാണത്തെച്ചൊല്ലി എട്ടാം വാർഡ് കൗൺസിലർ സിജി ടോണിയും നഗരസഭാ ചെയർമാൻ ആൻ്റോ ജോസ് പടിഞ്ഞാറെക്കരയും തമ്മിൽ രൂക്ഷമായ വാക്കുതർക്കവുമുണ്ടായിരുന്നു.

 ഈ സാഹചര്യത്തിൽ പ്രതിപക്ഷ കൗൺസിലർമാർ ഇന്ന് നടത്തുന്ന  സന്ദർശനം  വിഷയം കൂടുതൽ മൂർച്ഛിക്കുന്നതിന് ഇടയാക്കിയേക്കും.

നാളെ നഗരസഭാ കൗൺസിൽ യോഗമുണ്ടെന്നാണ് അറിയുന്നത്. മറ്റൊരു വിഷയത്തിലുള്ള  അടിയന്തിര കൗൺസിൽ യോഗമാണ് നടക്കുന്നതെങ്കിലും കൊച്ചിടപ്പാടി റോഡ് വിഷയം പ്രതിപക്ഷം ഉന്നയിക്കാനിടയുണ്ട്.

ഇന്ന് വൈകിട്ട് പ്രതിപക്ഷാംഗങ്ങൾ നടത്തുന്ന റോഡ് സന്ദർശനം വാർത്തയാകുമ്പോൾ  മറുതന്ത്രങ്ങൾ മെനയാൻ ഭരണപക്ഷവും നിർബന്ധിതരായേക്കും.