ആറ്റുകാല്‍ പൊങ്കാല മഹോത്സവം ഇന്ന് ആരംഭിക്കും. പത്തു ദിവസം നീണ്ടുനില്‍ക്കുന്ന ഉത്സവം രാവിലെ എട്ടിന് ദേവിയെ കാപ്പുകെട്ടി കുടിയിരുത്തുന്നതോടെയാണ് ആരംഭിക്കുന്നത്.27ന് ഉത്സവം അവസാനിക്കും.
കുംഭ മാസത്തിലെ പൂരം നാളായ 25നാണ് ഭക്തര്‍ പൊങ്കാല സമര്‍പ്പിക്കുന്നത്. വൈകിട്ട് ആറിന് ആരംഭിക്കുന്ന കലാപരിപാടികളുടെ ഉദ്ഘാടനം നടി അനുശ്രീ നിര്‍വഹിക്കും.
ആറ്റുകാല്‍ അംബാ പുരസ്‌കാരം സാഹിത്യകാരന്‍ ജോര്‍ജ് ഓണക്കൂറിന് സമ്മാനിക്കും. 19ന് രാവിലെ 9.30ന് കുത്തിയോട്ട ബാലന്മാര്‍ക്കുള്ള വ്രതം ആരംഭിക്കും. പൊങ്കാല മഹോത്സവ ദിവസമായ 25ന് രാവിലെ 10.30യ്ക്ക് അടുപ്പുവെട്ട്, ഉച്ചയ്ക്ക് 2.30ന് പൊങ്കാല നിവേദ്യം, രാത്രി 7.30യ്ക്ക് കുത്തിയോട്ട ബാലന്മാര്‍ക്കുള്ള ചൂരല്‍കുത്ത്, രാത്രി 11ന് മണക്കാട് ശാസ്താ ക്ഷേത്രത്തിലേക്കുള്ള പുറത്തെഴുന്നള്ളത്ത് എന്നിവയാണ് ചടങ്ങുകള്‍. 26ന് രാവിലെ എട്ടിന് ദേവിയെ അകത്ത് എഴുന്നള്ളിക്കും. രാത്രി 9.45 ന് കാപ്പഴിക്കും. 12.30 ന് കുരുതി തര്‍പ്പണത്തോടെ ഉത്സവം സമാപിക്കും. പൂര്‍ണമായും ഗ്രീന്‍ പ്രോട്ടോക്കോള്‍ പാലിച്ചാണ് ഇത്തവണത്തെ പൊങ്കാല മഹോത്സവം. മെഡിക്കല്‍ ടീം, പബ്ലിക് ഹെല്‍ത്ത് ടീം, സാനിട്ടേഷന്‍ ടീം എന്നിങ്ങനെ സംഘങ്ങളായി തിരിഞ്ഞ് പ്രവര്‍ത്തിക്കും. ഫെബ്രുവരി 17 മുതല്‍ 26 വരെ രാവിലെ ഏഴ് മുതല്‍ 10 വരെ രണ്ട് ഷിഫ്റ്റുകളിലായി ഡോക്ടര്‍മാര്‍, സ്റ്റാഫ് നഴ്‌സ്, അറ്റന്റര്‍ എന്നിവരുടെ സേവനമുണ്ടാകും. രണ്ട് 108 ആംബുലന്‍സുകളുടെ മുഴുവന്‍ സമയ സേവനവും ലഭ്യമാകും.
"യെസ് വാർത്ത''യിൽ
വാർത്തകൾ കൊടുക്കുന്നതിനും,
പരസ്യങ്ങൾ ചെയ്യുന്നതിനുമായി
വിളിക്കുക.
70 12 23 03 34
0 Comments