സംസ്ഥാനത്തെ വൈദ്യുതി പ്രതിസന്ധിക്ക് ആശ്വാസമായി അധിക വൈദ്യുതി വാങ്ങാന് കെഎസ്ഇബിക്ക് അനുമതി. ഹ്രസ്വകാലാടിസ്ഥാനത്തില് അധിക വൈദ്യുതി വാങ്ങാനുള്ള കെഎസ്ഇബിയുടെ അപേക്ഷയ്ക്കാണ് റെഗുലേറ്ററി കമീഷന് അംഗീകാരം നല്കിയത്.
മെയ് പകുതി വരെ ഉണ്ടാകാനിടയുള്ള പ്രതിസന്ധി മറികടക്കാന് 250 മെഗാവാട്ട് വരെ അധിക വൈദ്യുതി ലഭ്യമാക്കും. പവര് എക്സ്ചേഞ്ചുകളിലെ ‘ടേം എ ഹെഡ് മാര്ക്കറ്റ്’ വഴി വാങ്ങുമ്പോള്, യൂണിറ്റിന് പരമാവധി 10 രൂപയും, അഞ്ച് പൈസ വരെ മാര്ജിനും നിശ്ചയിച്ചിട്ടുണ്ട്.
സുതാര്യമായ രീതിയില് കുറഞ്ഞ സമയത്തിനുള്ളില് വൈദ്യുതിയുടെ അളവും വിലയും നിശ്ചയിച്ച് വാങ്ങാന് കഴിയുന്ന ഒടിസി പ്ലാറ്റ് ഫോം ഉപയോഗിക്കാനും കമീഷന് അനുമതി നല്കി. ഹ്രസ്വകാല വൈദ്യുതി സംഭരണം നിയന്ത്രിക്കുന്നതിനും നടപ്പാക്കുന്നതിനുമായി അപെക്സ് കമ്മിറ്റി, ഓപ്പറേഷണല് കമ്മിറ്റി എന്നീ സമിതികളുടെ രൂപീകരണത്തിനും കമ്മീഷന് അംഗീകാരം നല്കി.
വൈദ്യുതി വാങ്ങുമ്പോള് ബോര്ഡ് കൂടുതല് ജാഗ്രത കാട്ടണമെന്ന് നിര്ദേശിച്ചിട്ടുണ്ട്. സംസ്ഥാനത്തെ വൈദ്യുതി സാഹചര്യം ദിവസവും വിലയിരുത്താന് പ്രത്യേക സംവിധാനം ഒരുക്കണം.
ഈ വിവരങ്ങള് ബോര്ഡ് ചെയര്മാന് ഉള്പ്പെടെയുള്ള ഉന്നതതലത്തില് റിപ്പോര്ട്ട് ചെയ്യണം. വൈദ്യുതി വാങ്ങി കഴിഞ്ഞ് ഒരാഴ്ചയ്ക്കകം പൂര്ണ വിവരങ്ങളും ചെലവായ തുകയും കമീഷനെ ബോധിപ്പിക്കണമെന്നും ഉത്തരവില് വ്യക്തമാക്കിയിട്ടുണ്ട്.
കടുത്ത വേനലും വൈദ്യുതി ഉപഭോഗത്തിലുണ്ടായ അപ്രതീക്ഷിത വര്ധനവുമാണ് അധിക വൈദ്യുതി വാങ്ങേണ്ട സ്ഥിതി സംജാതമാക്കിയത്. വേനല് മഴയുടെ കുറവും എല്പിജി ലഭ്യത കുറവു മൂലം പാചകത്തിന് വൈദ്യുതി ഉപകരണങ്ങള് കൂടുതലായി ഉപയോഗിക്കുന്നതും വൈദ്യുതി ആവശ്യകത വര്ധിക്കാന് കാരണമായതായി ഇലക്ട്രിസിറ്റി ബോര്ഡ് വിലയിരുത്തുന്നു.
"യെസ് വാർത്ത''യിൽ
വാർത്തകൾ കൊടുക്കുന്നതിനും,
പരസ്യങ്ങൾ ചെയ്യുന്നതിനുമായും ,
വാർത്താ സംബന്ധമായ കാര്യങ്ങൾക്കും
വിളിക്കുക.
70 12 23 03 34
0 Comments