അറിവിൻ്റെ ശിവഗിരി തീർത്ഥാടനം ഇന്ന് ലോകശ്രദ്ധ നേടിയിരിക്കുന്നു

അറിവിൻ്റെ ശിവഗിരി തീർത്ഥാടനം ഇന്ന് ലോകശ്രദ്ധ നേടിയിരിക്കുന്നു - കെ.പത്മകുമാർ.

എസ് എൻ ഡി പി യോഗത്തിനു കീഴിൽ യൂണിയനുകളും ശാഖകളും കുടുംബയൂണിറ്റുകളും മൈക്രോയൂണിറ്റുകളും ശക്തമായതിനാൽ ഇന്ന് ഓരോ തീർത്ഥാടനകാലത്തും മാത്രമല്ല, വർഷത്തിൽ മുന്നൂറ്റി അറുപത്തിഅഞ്ച് ദിവസവും ശിവഗിരിയിലേയ്ക്ക് തീർത്ഥാടകരുടെ മഹാപ്രയാണമാണ് നടക്കുന്നത്. വെള്ളാപ്പള്ളി നടേശൻ അവറുകളുടെ നേതൃത്വം ഇതിന് പ്രത്യേക പരിഗണനയും ശ്രദ്ധയുമാണ് നൽകുന്നത്.

ലോകത്തിൻ്റെ വിവിധ ഭാഗങ്ങളിൽ നിന്നും ഇന്ന് തീർത്ഥാടകർ ശിവഗിരിയിലേയ്ക്ക് എത്തുന്നു എന്നും മഹാഗുരുവിലേക്കുള്ള ഈ മഹാപ്രയാണം ഇന്ന് അറിവിൻ്റെ തീർത്ഥാടനം എന്ന നിലയിൽ ലോകശ്രദ്ധ നേടിയിരിക്കുകയാണ് എന്നും പത്തനംതിട്ട യൂണിയൻ പ്രസിഡൻ്റ് കെ.പത്മകുമാർ പറഞ്ഞു. 93-ാമത് ശിവഗിരി - ഗുരുകുലം തീർത്ഥാടനത്തിൻ്റെ ഭാഗമായി എസ്.എൻ.ഡി.പി. യോഗം മീനച്ചിൽ യൂണിയൻ്റെ നേതൃത്വത്തിൽ നടക്കുന്ന 11-ാമത് പദയാത്ര "ഇടപ്പാടി മുതൽ ശിവഗിരി വരെ" പാലാ ഇടപ്പാടി ആനന്ദഷൺമുഖ സ്വാമി ക്ഷേത്ര സന്നിധിയിൽ വച്ച് ഉത്ഘാടനം ചെയ്ത് പീതപതാക കൈമാറി സംസാരിക്കുകയായിരുന്നു അദ്ദേഹം.

മീനച്ചിൽ യൂണിയൻ ചെയർമാൻ സുരേഷ് ഇട്ടിക്കുന്നേൽ, വൈസ് ചെയർമാൻ സജീവ് വയലാ, കൺവീനർ .എം.ആർ.ഉല്ലാസ്, ജോ.കൺവീനർ .ഷാജി തലനാട്, പദയാത്രാ ക്യാപ്റ്റൻ സി.റ്റി.രാജൻ എന്നിവർ പീതപതാക ഏറ്റുവാങ്ങി. പദയാത്രക്കൊരു ഗുരുദക്ഷിണയായ വിവിധ ശാഖായോഗങ്ങളിൽ നിന്നും പോഷക സംഘടനകളിൽ നിന്നും ആയി പാദ കാണിക്കയായി ലഭിച്ച തുകയുടെ സ്വീകരണവും നടന്നു.

തൊണ്ണൂറ് വയസ്സിലേയ്ക്കെത്തിയ ദേവകിയമ്മ മുതൽ മൂന്ന് വയസിലേക്കെത്തിയ നാണുക്കുട്ടൻ ഉൾപ്പെടെ നൂറിലതികം സ്ഥിരം പദയാത്രികരെ കൂടാതെ നിരവധി പ്രവർത്തകരും ഭാരവാഹികളും ഏഴു ദിവസങ്ങളിലായി നടക്കുന്ന അറിവിന്റെ തീർത്ഥാടനത്തിൽ അനുധാവനം ചെയ്യുന്നു.

എസ് എൻ ഡി പി യോഗത്തിൻ്റെ വിവിധ യൂണിയനുകളുടെ നേതൃത്വത്തിൽ നടക്കുന്ന പദയാത്രകളിൽ ഏറ്റവും ദൂരം താണ്ടിയെത്തുന്ന പദയാത്ര എന്ന പ്രത്യേകത കൂടി ഉണ്ട് മീനച്ചിൽ യൂണിയൻ പദയാത്രികർക്ക്. ജനുവരി 1 ന് യോഗം വൈസ് പ്രസിഡൻ്റ് .തുഷാർ വെള്ളാപ്പള്ളിയുടെയും മറ്റ് യോഗം നേതാക്കളുടെയും നേതൃത്വത്തിൽ ശിവഗിരിയിൽ പദയാത്രയെ സ്വീകരിക്കും.

യോഗം അസിസ്റ്റൻ്റ് സെക്രട്ടറി റ്റി.പി സുന്ദരേശൻ, ഷാജി മുകുളേൽ, സതീഷ് മണി എന്നിവർ ആശംസകൾ നേർന്നു. യൂണിയൻ അഡ്മിനിസ്ട്രേറ്റീവ് കമ്മിറ്റി ഭാരവാഹികളായ അനീഷ് പുല്ലുവേലിൽ, സുധീഷ് ചെമ്പൻകുളം, സാബു കൊട്ടൂർ, സജി ചേന്നാട്, പോഷകസംഘടന ഭാരവാഹികളായ അരുൺ കുളമ്പള്ളി,

ഗോപകുമാർ പിറയാർ, രാജീ ജിജിരാജ്, സിന്ധു സാബു, പ്രദീപ് പ്ലാച്ചേരി,എം.റ്റി.സോമൻ, ഹരീഷ് ഹരി, സിബി ചിന്നൂസ് വിവിധ ശാഖാ ഭാരവാഹികൾ, പോഷക സംഘടനാ ഭാരവാഹികൾ എന്നിവർ നേതൃത്വം നൽകുന്നു.

രാവിലെ ഇടപ്പാടി ശാഖയുടെ സ്വീകരണം ഏറ്റുവാങ്ങി പ്രയാണം ആരംഭിച്ച പദയാത്രയ്ക്ക് ഭരണങ്ങാനം, ഇടമറ്റം, മൂന്നാംതോട്, മല്ലികശ്ശേരി, തിടനാട് തുടങ്ങിയ സ്ഥലങ്ങളിൽ സ്വീകരണങ്ങൾ ഏറ്റുവാങ്ങി കുളപ്പുറം ശാഖയിൽ ആദ്യ ദിവസത്തെ പ്രയാണം അവസാനിച്ചു.